2017 jyldyń 9 shildesi qazaqstandyq opera óneri úshin tarıhı kún retinde este qalmaq. Ónerdi baǵalaıtyn óresi bıik tyńdarman opera juldyzdarymen kezdesip, klasıkalyq ádemi keshtiń kýási boldy. Halyq ásem án tyńdap, opera ánshileriniń qundy murasy jınaqtalǵan «Qazaq operasynyń ańyzdary» antologıamen tanysty. Tusaýkeser konsert «Astana EKSPO – 2017» kórmesi aıasynda ótti.
Klasıkalyq opera óneri kez-kelgen memlekettiń mádenı-rýhanı ómiriniń kúre tamyry desek bolady. Qazaqstandyq opera sahnasynda ult maqtanyshyna aınalǵan, keler urpaqqa úlgi bolǵan tulǵalar az emes. Olardyń aty tarıhta altyn áriptermen jazyldy. Bul jobanyń basty ereksheligi – opera tarıhynda oıyp turyp oryn alatyn tulǵalar týraly arhıvterden alynǵan qundy derekter, fotosýretter men olardyń daýysy jazylǵan vıdeomaterıaldar sandyq tehnologıaǵa kóshirilip, CD, DVD dıskterge jınaqtaldy. Atap aıtqanda Kúlásh Baıseıitova, Roza Baǵlanova, Rıshat Abdýllın, Bıbigúl Tólegenova, Ermek Serkebaev, Roza Jamanova, Álibek Dinishovterdiń shyǵarmashylyq muralaryna arnalyp jeke-jeke býkletter daıyndaldy. Iaǵnı, bir ǵana antologıalyq jınaqta jeti birdeı qazaqstandyq opera óneriniń sheberleri, KSRO Halyq artıseriniń ómir-deregi, shyǵarmashylyǵy qamtyldy. Jan-jaqta shashylyp júrgen qundy dúnıeler jınaqtaldy. Antologıa opera ánshileriniń ánderi jazylǵan 7 aýdıodıskten (ár oryndaýshyǵa bir dıskten) jáne olardyń konserttik, ózge de vıdeolary bar 7 DVD-dısk pen býkletten turady.
Antologıa tusaýkeserimen birge kórnekti ánshilerdiń qatysýymen konsert ótti. Oǵan Keńes Odaǵynyń halyq ártisi, Sosıalısik Eńbek Eri Bıbigúl Tólegenova, Qazaqstannyń eńbek sińirgen qaıratkerleri: Álfıa Karımova, Talǵat Musabaev, Tamara Asar, Andreı Tregýbenko, Jupar Ǵabdýllına, Halyqaralyq konkýrstardyń laýreaty – Rýstam Súleımanov, Astana qalasy ákimdiginiń memlekettik akademıalyq fılarmonıasynyń sımfonıalyq orkestri men onyń kórkemdik jetekshisi – Berik Batyrhanuly, dırıjery Erbolat Ahmedárovtar qatysty.
Jobany uıymdastyrýshy QR Mádenıet jáne sport mınıstrligi men «Mıras» qoǵamdyq ulttyq mádenı qory» Qoǵamdyq qory. Aqparattyq demeýshi – KAZAKH TV jáne STV telearnalary. Joba avtory – KSRO Halyq artısi, Sosıalısik Eńbek Eri Bıbigúl Tólegenova.
«Osyndaı úlken jobany jasaǵanymyzǵa qýanyshtymyz. Kúlásh Baıseıtovadan bastap Roza Jamanovalar, Rıshat Abdýllınder opera óneriniń damýyna úles qosyp, sonyń alǵashqy baspaldaǵyn qalady. Qazaqty álemge tanytty. Búgingi joba sol óner adamdarynyń týyndylaryn bir jerge jınaqtap, ensıklopedıalyq dısk shyǵarýmen erekshelenip otyr. Barsha óner súıer qaýym men ózimniń atymnan osy jobanyń bastamashysy bolǵan Bıbigúl Ahmetqyzy Tólegenovaǵa janqıarlyq eńbegi men ónerdegi qyzmeti úshin sheksiz alǵys bildiremin!», - dedi QR Mádenıet jáne sport vıse-mınıstri Aqtoty Raıymqulova.
Árıne, jobanyń negizgi maqsaty opera ánshileriniń shyǵarmashylyǵyn túgendep, jas urpaqqa klasıkalyq mýzykany nasıhattaý. Tarıhı mısıasy da bir bólek.
«Mundaı joba elimizde birinshi ret jasalyp otyr. Buǵan deıin opera ánshileriniń barlyǵynyń birdeı shyǵarmashylyǵy men sýretteri, ánderi bir antologıaǵa jınaqtalǵan emes. «Óli razy bolmaı, tiri baıymaıdy» degen bar. Sol sebepti osy kem-ketiktiń ornyn toltyrǵymyz keldi», - deıdi KSRO Halyq artısi, Sosıalısik Eńbek Eri Bıbigúl Tólegenova.
Jobanyń halyqaralyq mańyzy da joǵary. «Astana EKSPO-2017» halyqaralyq kórmesi sheńberinde uıymdastyrylǵan «Qazaq operasynyń ańyzdary» jobasy táýelsiz Qazaqstandy álemdik deńgeıde ózgelerge tanytýdyń tóte joly bolǵany sózsiz.
