Ózge eldi qaıdam? Bir jylda qońsy Qytaıdaǵy 100 myń qazaqqa Atajurtyna kelýge vıza berilipti. Bul resmı málimet. Sonyń yqpaly bolsa kerek, bıylǵy jazda Almatyǵa jańbyr emes «qazaq» jaýdy. Otbasymen keldi, baýyrymen keldi, qaryndasymen keldi. Týysyn izdedi, jaqynyn tapty, qushaqtar aıqasty, kóńilder jaılandy. Myna beınekórinistegi Pátiqan Aıjaqsy aqsaqalda biraz kún Almatynyń turǵyny boldy. Kóp sóılemeıdi, tipti sózi az. Sóıtsek, bul kisi kúıdiń ıesi eken. Dombyrasy bar ortada qos ishekti bebeýletip jiberedi. Biz «Máńgilik elmiz» dep maqtandyq aqsaqalǵa. Bul kisi lám-mıim degen joq. Dombyrany alyp, «bul meniń «Máńgilik saǵynysh» degen kúıim» dedi. Sherte jóneldi...

Óte almaı, kete almaı, jete almaı... Óte almaı, kete almaı, jete almaı... Kúıdiń áýeni osy sózdi qaıtalaǵandaı boldy. Óte almaı, kete almaı, jete almaı...

Shoshaq bórkin shoqshıtyp, Ospan batyr jeldiń ótinde turǵandaı, tórt saıly kıiz qalpaǵyn kıip, Esengeldi bı shekaranyń shetinde turǵandaı... Kózinen sorasy aǵyp, Qajyǵumar aqsaqal tizesimen jorǵalaǵandaı... Aqyt qajy azan aıtyp, Tańjaryq taýdy jańǵyrtqandaı... Áıteýir, tepsingen el, oqyranǵan tulpar, entikken bala, shapqan at... Jaqyndaıdy, ekpinmen keledi, eljirep keledi, ezilip keledi, bozdap keledi... Óte almaıdy, jete almaıdy. Qaıta qaıtady... Sosyn zarlaıdy. «Óte almaı, kete almaı, jete almaı».... Saǵynady, sarǵaıady, ushyp ótkisi keledi, qanaty qaıyrylady. Kesip ótkisi keledi, kete almaıdy. Aılanyp ótkisi keledi, attatpaıdy...

Atam ótken jol edi, anam ótken jol edi... Nege jabyldy? Artynyp-tartynyp aqsúıek, atysyp-shabysyp batyr ótken tar soqpaq... Tars jabyq.

Zar, zar, zar... egilý.  Ózimdi saqtadym, kózimdi saqtadym, sózimdi saqtadym... Babamdy jerledim, anamdy jerledim... Zırattar qımaıdy, zırattar qınaıdy... bári de saqtaldy, báride aqtaldy... taptaldy. Jutyp barady... Sińirip barady.... Qutqar!!! Tekti azaıǵan, tepki kúshti... Qara orman – jetim. Jelbirep kók tý tur. Tizginge jabysasyń, shylbyrdy silkısiń, júgendi bos qoıa beresiń... shap, shap, shap. Tas. Qazandaı qara tas. Soǵylasyń, qaıtasyń... Soǵylasyń, qaıtasyń.

Beý, zar zaman! Anam qalsyn ańyrap, atam qalsyn bozdap. Aǵam qalsyn qıa almaı, qaryndas qalsyn kóz jasyn tıa almaı.... Balam ótsin, balam ketsin. Et júregim jetsin, kókireginen ıterme, keýdesin baspa! Kótere almaıdy. Qul emes, kúń emes!!!

Bildiń be eı, kórdiń be eı, sezdiń be eı, sendiń be eı... Zarlatpa, jyltpa, zarlatpa, jylatpa. Bir túıir topyraq, bir tamshy móldir sý... Shaqyrdy, ketemin. Shaqyrdy, jetemin. Ótemin, ketemin...

Bildiń be eı, kórdiń be eı, sezdiń be eı, sendiń be eı...

Erlan Tóleýbaı