Búgin Oral ózeni boıymen dástúrli túrde uıymdastyrylatyn HHİ tarıhı-mádenı, ekologıalyq ekspedısıasy óz jumysyn bastady. Bul shara 2016 jyldyń kúzinde Qazaqstan men Reseı elderi basshylary qol qoıǵan kelisim aıasynda eki eldiń pikirlesteriniń basyn biriktirdi.
Ekspedısıanyń ıdeıalyq dem berýshisi ári kóshbasshysy Elena Tarasenko ardagerlerdi, ekolog-ǵalymdar men ólketanýshylardy, qoǵam qaıratkerleri men jastardy, mass-medıa ókilderi men sportshylardy, týrızm jáne sport uıymdastyrýshylaryn bul joly da óz týy astyna biriktire bildi. Búgin ekspedısıa myqty dostyq qarym-qatynas ornaǵan kórshiles Orynbor jerinen bastaý almaq. Reseılik aǵaıyn Batys Qazaqstan oblysynyń ákimi Altaı Kólginov bastaǵan bir top óńir delegasıa múshelerin Orynbor oblysynyń Elek aýdany mańynan qarsy almaq.
Ekspedısıa baǵdarlamaǵa sáıkes Reseı jeriniń Podstepkı aýylynan 21 shildede qozǵalatyn bolady. Birneshe kúnge eseptelgen ekspedısıa barysynda Oraldyń Biryńǵaı kúnderi merekesin atap ótýge oraı Batys Qazaqstan oblysy men Orynbor oblysynyń óńir basshylarynyń basqosýy, túrli jıyndar men merekelik konsertter, jastar fleshmobtaryn ótkizý josparlanǵan.
Merekelik sharalar aıasynda aǵymdaǵy jyldyń kókteminde Oral ózeni týraly eki el arasyndaǵy ortaq hattamaǵa sáıkes BQO oblys ákimi A.Kólginov pen Orynbor oblysynyń gýbernatory Iý.Bereg resmı túrde bekitken Oraldyń Biryńǵaı kúnderi mekemesiniń sımvoly ornatylatyn bolady. Osy aıtýly kúnge oraı «Oral ózenine qomqorlyq jasaı otyryp, baýyrlas halyqtardyń elderi men dostyǵyn saqtaımyz» taqyrybynda tarıhı-ekologıalyq konferensıa ótkiziledi.
Oral-Jaıyq ekspedısıasy Orynbor oblysynyń sýly aımaqtarynda ótkiziledi. Budan soń ekspedısıa Batys Qazaqstan oblysynyń Bórli, Shyńǵyrlaý, Terekti aýdandaryndaǵy Ýspenovka, Jańatalap, Jarsýat, Aqsýat aýyldarynda, Oral qalasynyń Jelaev, Zashaǵan kentterine aıaldap, jergilikti turǵyndarmen kezdesip, túrli mádenı-sporttyq sharalar ótkizedi.
Eki eldiń birlesken jańa brendiniń sharyqtaý shegi 26 shilde kúni Oral qalasynda ótetin «Qorshaǵan ortany jaqsartýdaǵy áıelderdiń róli» atty halyqaralyq forým bolmaq.
