Almatyda tramvaı jelilerin alý jumystary jalǵasyp jatyr. Shilde aıynda 18 kóshe qıylysyndaǵy relster demontajdalady, dep habarlaıdy Qamshy.kz aqparat agenttigi.

Atap aıtqanda Jarokov kóshesi men Tımırázev, Abaı, Jandosov, Sátpaev kósheleriniń, Maqataev kóshesi men Jangeldın, Qaldaıaqov, Abylaı han, Panfılov kósheleriniń qıylysyndaǵy tramvaı jelileri alynady.

Sondaı-aq, Tóle bı kóshesi men Ótegen batyr, Rozybakıev, Turǵyt Ozal, Momyshuly, Tilendıev, Brýsılovskıı kósheleriniń qıylysyndaǵy eskirgen relster alynatyn bolady.

Qalalyq Avtomobıl joldary basqarmasy ázirge bul jumystardyń qaı kúni bastalatynyn habarlaǵan joq. 

Búginde Shevchenko kóshesiniń boıyndaǵy Qonaev pen Tólebaev kóshesine deıingi aımaqta, Ótepov kóshesiniń boıyndaǵy Jarokov pen Rozybakıev arasyndaǵy bólikten, Qonaev kóshesiniń boıyndaǵy Shevchenko men Qabanbaı batyr arasyndaǵy bóliginde tramvaı relsteri alyndy.

Joǵaryda atalǵan qıylystarda jol qozǵalysy shekteýli bolmaq.

Qazirge deıin josparly 250 myń sharshy metr aýmaqqa salynatyn jol tóseminiń 50 myń sharshy metrine jol tósemi salynǵan. Jóndeý jáne qurylys jumystaryna jergilikti búdjetten 9,5 mıllıard teńge (shamamen 30 mıllıon dollar) bólingen.

Qalalyq ákimdiktiń habarlaýynsha, "joldaǵy kólik aǵynyn arttyratyn" jumystar kelesi aıda bastalady. Almatyda tramvaı qozǵalysy 2015 jyly kúzde, tramvaı qatysqan eki jol apatynan soń toqtatylǵan. Almaty turǵyndary ınternette qalada tramvaıdy qoldap qol jınaǵan. Tramvaı qyzmetin toqtatýdy synaıtyndar tramvaı qaladaǵy tramvaı deposy ornalasqan tórt gektar jerdi ıelený qajet bolǵandyqtan toqtatylǵan bolýy múmkin deıdi. Ótken aptada ekologıa belsendileri qala ákimi Baýyrjan Baıbekke "qala ekologıasyn, sáýleti men tarıhyn joıýǵa sińirgen eńbegi" úshin gramota tapsyrǵan.