Aqmola oblysynda perzenthanada shetinep ketti degen qyzyn 14 jyldan keıin jetimder úıinen tapqan ata-ana akýsherlerdiń jazalanýyn talap etýde dep habarlaıdy Qamshy.kz aqparat agenttigi Ktk.kz-ke silteme jasap. Óıtkeni, tuńǵyshtary solardyń kesirinen «tiri jetim» atanǵanyna senimdi. Aqtas aýylynda turatyn erli-zaıypty Beısenovtar qazir óz balasyn ózderi asyrap alý úshin qujat ázirlep jatyr. Alǵashynda, bul jaǵdaıǵa sener-senbesin bilmegen otbasy qyzdaryn jurtqa kórsetýge batpaǵan eken.

14 jyl tastandy atanyp, jetimder úıin panalaǵan Baqyt qazir rasymen baqytty. Bir kúnde ata-anasy tabylyp, baýyrlarymen de qaýyshty. Al 2 qyz, bir ul tárbıelep otyrǵan erli-zaıypty Beısenovtar osylaısha qatarlaryna taǵy bir qyz qosylyp, kópbalaly otbasy atanyp otyr.

Baqyt Ǵabdýllına:

-Úıime oraldym. Týǵandarymdy taptym. Anam, ákem, inim men eki sińilim bar ekenin buryn bilgen joqpyn ǵoı. Qazir baqyttymyn. Týystarym kóp. 

Al 14 jyl burynǵy oqıǵa Kókshetaýdaǵy myna perzenthanada bolǵan. Aýyldan qalaǵa ájelerine qonaqqa kelgende tolǵatyp qalǵan Tolqyn osynda jetkiziledi. Sóıtip, júktiliginiń 5-6 aıynda bosanǵan. "Bosanýdyń aýyr bolǵany sonsha, tuńǵyshymnyń jylap týǵanyn estı almaı, esim kiresili-shyǵasyly boldy", – deıdi ol.

Tolqyn Beısenova, Baqyttyń anasy:

– Bar esimde qalǵany – palataǵa alyp keldi. Sonda 1 kún jattym. Jylap-jylap, meni shyǵaryp jiberdi.

Kóp keshikpeı 2 qyzy – Farıza men Uljan birinen soń biri dúnıege kelgen. 7 aı buryn Beısenovtar uldy bolypty. Al tuńǵyshtarynyń sol joly 900 gram bolyp týylyp, jetilýi úshin aýrýhanada arnaıy ınkýbatorda jatqanyn olar bilmegen. "Dárigerler bala óli týdy degen soń, aýrýhanadan shyǵyp kettim", – deıdi Baqyttyń anasy. Qyzdyń tiri qalǵanyn bir aı buryn estigende, ata-anasy esten tana jazdapty.

Tolqyn Beısenova, baqyttyń anasy:

– Bas tarttym dep, eshteńege qol qoıǵan joqpyn. Eshteńe jazǵan joqpyn. 14 jylda qyz, mysaly qańǵyryp qaıda júrdi, kimmen boldy, bilmeımiz ǵoı. Bir kináli adam bolý kerek. Jaýap berý kerek.

Biraq jaýapty eshkim bermeıtin syńaıly. Óıtkeni, oblystyq prokýratýranyń nusqaýymen Densaýlyq saqtaý basqarmasy qyzmettik tekseris júrgizgen. Al olar Baqyttyń anasynyń sózin joqqa shyǵaryp otyr.

Bıbigúl Imanqulova, Aqmola oblystyq densaýlyq saqtaý basqarmasy basshysynyń orynbasary:

– Barlyq muraǵatty aqtaryp, osy balanyń týý týraly qaǵazdaryn kórdik. Onda, mine, jedel járdem qaǵazyna deıin saqtalǵan. Sol ýaqyttaǵy zańdylyqta 6 aılyq shala týǵan bala «túsik» bolyp esepteletin. Qazir tiri adam dep tirkeledi. Anasyn dárigerler izdemedi degeni beker. Mine, jedel járdem bergen meken-jaı boıynsha ony izdep baryp, balanyń aman ekenin aıtqan qaǵaz da bar.

Qyz osylaısha áke-sheshesi bas tartqan sábı retinde perzenthanadan Shýchedegi sábıler úıine jiberipti. Ázirge bul – qyzmettik tekseristiń qorytyndysy ǵana. İstiń tolyq mán-jaıyn quqyq qorǵaý oryndary endi anyqtaıdy.