Elbasy Nursultan Ábishuly «Qazaqstan - 2030» strategıalyq damý baǵdarlamasynda salaýatty ómir súrýdiń saltyn qalyptastyrý úshin dene tárbıesimen aınalysyp, esirtki, temeki men alkagoldi tutynýdy qoıyp, tazalyq pen sanıtarıa sharalaryn saqtaýdyń mańyzdylyǵyn aıtqan bolatyn. Osy oraıda elimizde engizilgen «Densaýlyq» memlekettik baǵdarlamasynda 2020 jylǵa qaraı Qazaqstan Respýblıkasy halqynyń ómir súrý uzaqtyǵy 73 jasqa deıin ulǵaıtý máselesi qoıylǵan edi. Al salaýatty ómir súrýdiń birden-bir joly – sportpen shuǵyldaný ekeni barshaǵa málim. Qala basshysy Murat Muqaevtyń málimetinshe, oblysta turatyn 630 myńnan astam turǵynnyń 170 myńy sportpen shuǵyldanady. Turǵyndardyń densaýlyǵyn nyǵaıtý maqsatynda óńirde 1545 sport nysany, ıaǵnı úsh stadıon, bir sport saraıy, 11 sport kesheni, bir sporttyq manej, alty shańǵy jáne eki esý bazasy, 101 atý tıri, 965 jazyq ǵımarat, 20 tenıs korty, bes júzý baseıni, úsh hokeı korty jáne 276 sport zaly men 151 japsarlas sport zaly jumys jasaýda. Sonymen qosa jergilikti turǵyndardy sportqa tartý maqsatynda buqaralyq sporttan, kópshilik júgirýden jarystar jıi uıymdastyrylyp keledi. Jýyrda ǵana óńirde sport kúni toılanyp, kópshilik júgirýge qatysqan turǵyndar Jeńis alańynan Abaı alańyna deıin júgirip ótip, keıbireýi marapattaldy. Jalpy dúnıejúzilik densaýlyq saqtaý mamandary densaýlyqqa áser etetin faktorlardyn 50-60%-y ómir súrý deńgeıine, 20%-y tuqym qýlaýshylyqqa, 20%-y syrtqy ortanyń jaǵdaıyna, 8-10%-y dárigerlik kómektiń dengeıine baılanysty ekenin aıta kelip, densaýlyq úshin kúres salaýatty ómir saltyn nasıhattaýǵa arnalǵan sharalardan bastaý alatyndyǵyn dáleldeıdi. Sonymen qosa turǵyndarǵa medısınalyq kómek berýdiń qoljetimdiligi de mańyzdy. Oblystyq densaýlyq saqtaý basqarmasy baspasóz qyzmetiniń málimetine súıensek, turǵyndarǵa medısınalyq kómektiń qoljetimdiligin qamtamasyz etý maqsatynda qaladaǵy alty emhanaǵa jáne «Derkól» DA-ǵa elektrondy kezek júıesi engizilgen. Ol medısınalyq uıym ishinde medısınalyq qyzmetterdi alýǵa pasıentterdiń joldanýyn retteıdi. Elektrondy kezek pasıentterge qyzmet kórsetýler prosesin joǵary deńgeıde uıymdastyrýǵa múmkindik beredi. Medısınalyq qyzmetter sapasyn qamtamasyz etý úshin barlyq medısınalyq uıymdarda pasıentti qoldaý jáne ishki baqylaý qyzmetteri qurylǵan.
Gúlim AQAP,
Batys Qazaqstan oblysy
