Astanada «Jańǵyrý 3.0: Rýhanı jańǵyrý» atty halyqaralyq ǵylymı-praktıkalyq konferensıa bolyp ótti dep habarlaıdy Qamshy.kz aqparat agenttigi.
Bul sharany Eýrazıalyq ıntegrasıa ınstıtýty uıymdastyrdy.
Konferensıanyń maqsaty Qazaqstandy jańǵyrtýdyń ózekti suraqtary boıynsha keń aýqymdy máselelerdi talqylaý bolyp tabyldy.
Konferensıanyń jumysyna 100-den astam adam qatysyp, olardyń arasynda belgili ǵalymdar Z. Sháýkenova, Z.Qabyldınov, B.Ábdiǵalıuly jáne Qazaqstan men sheteldiń sarapshy-taldaýshy qoǵamdastyǵynyń basqa da ókilderi, joǵary oqý oryndarynyń profesorlary men oqytýshylary boldy.
Qazaqstan Respýblıkasy Premer-mınıstri Keńsesi basshysynyń orynbasary Erjan Jalbaquly Babaqumarov konferensıa qatysýshylaryna óziniń quttyqtaý sózin arnap, onda Nursultan Nazarbaevtyń qoǵamda rezonans týǵyzyp, qalyń kópshilik arasynda qoldaý tapqan «Bolashaqqa baǵdar: rýhanı jańǵyrý» atty baǵdarlamalyq maqalasy óziniń iske asyrylýy jóninen erekshe tásildi talap etetin jalpyulttyq aýqymdaǵy tereń maǵynaly qujat bolyp tabylatynyn atap ótti.
– Táýelsiz Qazaqstan tarıhynda áli eshqashan ult aldynda sanany jańǵyrtý sekildi asa tereń ári aýqymdy mindet turmaǵan edi. «Rýhanı jańǵyrý» – memlekettiń barlyq salalarynyń sapalyq turǵydan jańaryp-ózgerýine negiz bolýǵa tıis ıdeıalyq tuǵyrnama. Búgingi tańda jańarýǵa degen talpynys óziniń máni jóninen ulttyq-memlekettik ózin-ózi saqtaýmen jáne sapaly damýmen birdeı bolyp otyr, – dep atap ótti E. Babaqumarov.
Konferensıanyń moderatory – Eýrazıalyq ıntegrasıa ınstıtýtynyń dırektory Ǵanı Nyǵymetov Instıtýt júrgizip jatqan sosıologıalyq zertteýlerdiń keıbir aldyn ala qorytyndysyn aıtyp berdi:
– Zertteýler kórsetip otyrǵandaı, qazirgi tańda Úshinshi jańǵyrý sheńberindegi sharalardy iske asyrý úshin qolaıly jaǵdaı qalyptasyp otyr. Qoǵamdyq pikirde reformashyl kóńil-kúıdiń joǵary ekeni atap ótilýde. Qazaqstandyqtardyń 82%-ǵa jýyǵy el ómirinde ózgeris qajet dep esepteıdi. Bul rette qazirgi áleýmettik-saıası damý baǵytyn qoldaý deńgeıi de meılinshe joǵary – 88%.
Sosıologıalyq zertteýlerdiń derekteri qazaqstandyq qoǵam damýynyń áleýmettik-mádenı aspektilerin qozǵaıtyn jańǵyrý mindetteri men konstıtýsıalyq ózgerister qazaqstandyqtar arasynda qoldaý taýyp otyrǵanyn kórsetedi, – dep atap ótti Ǵ. Nyǵymetov.
Konferensıanyń jumysy barysynda jaýapty memlekettik qurylymdar men ǵylymı-sarapshylyq jurtshylyq ókilderi arasynda «Rýhanı jańǵyrý» baǵdarlamasy men Konstıtýsıalyq reformanyń sheshýshi baǵyttaryn iske asyrý barysyn talqylaý boıynsha keń kólemde syndarly suhbat órbidi.
Kezdesýge qatysýshylar qoǵamdyq sanany jańǵyrtý baǵdarlamasy sheńberinde júrgizilip jatqan jumysty keńinen jazyp-kórsetip, halyqqa túsindirý úshin suhbat alańy jumysynyń mańyzy zor ekenin atap ótti.
