Qazaqstandyq tanymal jekpe-jek ókili, Qýat «Naıman» Hamıtov Qanat Islamnyń Astanada Brendon Kýkke qarsy ótetin jekpe-jegine qatysty pikirin aıtty dep habarlaıdy Qamshy.kz aqparat agenttigi qsport.kz-ke silteme jasaı otyryp.

Qýat Hamıtov: «Jalpy, bul kezdesý jeńilistiń ashshy dámin tatyp kórmegen eki alyptyń shaıqasy bolaıyn dep tur. Ekeýi de tájirıbeli bolǵandyqtan, jekpe-jek kórermenderdiń aıyzyn qandyraıyn dep tur. Sebebi, bul keshte sporttyq mansabynda jeńilistiń ne ekenin bilmegen qos bylǵary qolǵap sheberiniń bireýi jeńiledi. Iaǵnı, sharshy alańda QAZAQ-ta Kýkte aıanyp qalmaıdy. Osyndaı tis qaqqan qarsylastar kezdeskende nokaýt kórýimiz neǵaıbyl. Menińshe, Qanat Islam upaı sanymen jeńiske jetetin sıaqty. Álbette, nokaýtpen jeńse, nur ústine nur bolady dep oılaımyn. Jalpy maǵan Qanat baýyrymyzdyń judyryqtasý máneri unaıdy. Sharshy alańda ózin erkin sezinip, qarsylasyn joıqyn soqqysynyń astyna alady da, der kezinde qorǵanysqa da kóshe biledi. Otandasymyzdyń Almatyda ótkizgen kezdesýi eń keremet jekpe-jeginiń biri boldy dep oılaımyn. Qazaqtyń jigitteri Qanat Islam sıaqty bolsa, elimniń barlyq erleri namysqoı, ultjandy bolatyn edi», – dep jekpe-jek týraly pikirin bildirdi.

Esterińizge sala keteıik, Astanadaǵy «Saryarqa» velotreginde ótetin keshtiń basty jekpe-jeginde birinshi orta salmaqtaǵy WBO NABO jáne WBA Inter-Continental tujyrymdary boıynsha álem chempıony Qanat QAZAQ Islam óz belbeýlerin kanadalyq Brendon Kýkqa  qarsy ótetin jekpe-jekte qorǵaıdy.

Sonymen qatar bul boks keshinde Janqosh Turarov, Jánibek Álimhanuly, Meıirim Nursultanov, Rýslan Myrsataev, Álı Ahmetov, Aıdos Erbosynuly, Dımash Nıazov jáne Nursultan Jańabaev sekildi otandastarymyz óner kórsetedi.