Búgin «Astana EKSPO – 2017» halyqaralyq kórmesi aıasynda Almaty oblysy men Shveısarıanyń Tıchıno kantonynyń arasynda ózara yntymaqtastyq týraly Memorandýmǵa qol qoıyldy. Bul týraly óńirlik ákimdik saıtynda habarlandy dep jazady Qamshy.kz.
Almaty oblysynyń ákimi Amandyq Batalov pen Tıchıno kantonynyń ekonomıka jáne qarjy mınıstri K.Vıtte qol qoıǵan qujat eki jaqty baılanystardyń jańa belesine jol ashady dep kútilýde.
Elimizdiń Qarjy mınıstri Baqyt Sultanov, Qazaqstan Respýblıkasynyń Shveısarıa Konfederasıasyndaǵy Tótenshe jáne Ókiletti elshisi Janar Aıtjanova, Shveısarıa Konfederasıasynyń prezıdenti Dorıs Loıdhardtyń jáne basqa da laýazymdy tulǵalardyń qatysýymen ótken Memorandýmǵa qol qoıý rásiminde oblys basshysy A. Batalov Jetisý óńiriniń ınvestısıalyq múmkindikterine qysqasha toqtalyp ótti.
- Almaty oblysy men Tıchıno kantony klımaty jaǵynan da, tabıǵaty jaǵynan da uqsas. Bir-birimizdi tolyqtyratyn, úırenetin ortaq dúnıeler barshylyq. Týrızmdi damytýda, aýyl sharýashylyǵyna, óńdeý ónerkásibine jańa tehnologıalar tartýda, jasyl energetıkany engizýde Shveısarıadan úırenerimiz kóp. Máselen, Almaty oblysynda turmystyq qatty qaldyqtardy óńdeıtin iri kásiporyn joq. Osy jaǵynan da áriptestik baılanys múmkindikterin qarastyrýdy josparlap otyrmyz. Aldaǵy ýaqytta tájirıbe almasý men eki tarap kásipkerleriniń arasynda jandy baılanys ornatýdyń ıgiligin turǵyndar kóredi dep oılaımyn, - deı kele A. Batalov tıchınolyq delegasıany Jetisý óńirine arnaıy shaqyrdy.
Tıchıno kantonynyń ekonomıka jáne qarjy mınıstri K. Vıtte óz sózinde memorandýmnyń zańdy jalǵasy retinde naqty jobalar júzege asyrylyp, ortaq nátıjege qol jetkiziletinine senim bildirdi.
Shara sońynda A. Batalov shveısarıalyq qonaqtarǵa oblystyń barlyq tarıhı oryndary aıqyn kórsetilgen qoldan ázirlengen kartasyn jáne Jetisý óńiri týraly kitapty syıǵa tartty.
Jalpy Qazaqstan men Shveısarıa arasyndaǵy áriptestik qarym-qatynastyń ornaǵanyna bıyl 25 jyl tolyp otyr. Memorandýmǵa qol qoıý rásimi osy aıtýly data qarsańynda EKSPO kórmesinde ótken Shveısarıanyń Ulttyq kúni aıasynda boldy.
