Taldyqorǵan qalasynda «Qazaqstan Respýblıkasy Memleket basshysynyń «Bolashaqqa baǵdar: Rýhanı jańǵyrý» maqalasynyń negizgi erejeleri arnaıy uıymdastyrylǵan ashyq dıalog alańynda túsindirildi. 
Sharaǵa 15 jyldyq tarıhy bar Almaty oblystyq ishki saıasat basqarmasynyń negizi qurylǵannan bastap, búgingi kúnge deıin basqarǵan jeti basshy, 16 aýdan jáne 3 qala gazetteriniń redaktorlary jáne jýrnalıser qatysty. 
Almaty oblysynyń ishki saıasat basqarmasynyń negizi 2002 jyly qurylǵany tarıhtan belgili. Sol kezeńnen bastap ár jyldary ishki saıasat basqarmasynda eńbek etken basshylar «Rýhanı jańǵyrý» taqyrybynda ózderiniń oılaryn óńirdiń ár aýdany men qalasynan kelgen bólim basshylary jáne gazetterdiń bas redaktorlarymen bólisti. Bul Elbasy maqalasynda kórsetilgen qoǵamnyń rýhanı jańǵyrýyndaǵy urpaqtar sabaqtastyǵynyń aıqyn kórinisi.
«Elbasy maqalasy boıynsha bizdiń óńirde de atqarylyp jatqan jumys shash etekten. El maqtanyshyna aınalǵan áıgili tulǵalarmen kezdesý, tarıh pen til taǵdyryn kótergen jıyndar, ásirese, latyn qarpine kóshý mindetin talqylaǵan basqosýlar «Rýhanı jańǵyrý» bastamasy aıasynda ótýde», — dedi erekshe dóńgelek ústeldi uıymdastyrǵan oblystyq ishki saıasat basqarmasynyń basshysy Rýstam Alpysbaev. 
«Eń alǵash óńirlerde ishki saıasat departamenti qurylǵanda Almaty oblysynyń basynda turyp, ıdeologıa salasyn dál osy Jetisýda qurǵanymdy maqtan etemin. Taldyqorǵan árqashan meniń júregimde», -dedi oblystyq ishki saıasat basqarmasynyń negizin qalaǵan Gúlsarýar Jakýbaeva.
«Almaty oblysynda İshki saıasat basqarmasynyń damý qarqynyna qarap otyrsam, merzim boıynsha 7 jyl qyzmet etip, eń kóp basqarǵan men ekenmin. Bul fakt men úshin abyroı. Biz basqarǵan ýaqyt eń bir kúrdeli, tarıhı kezeń bolǵanymen ózindik qyzyqtary da boldy. Eń alǵash oblysta jastar máselesin biz qolǵa alǵan edik. Bıylǵy Ult Kóshbasshysy «Bolashaqqa baǵdar: Rýhanı jańǵyrý» atty baǵdarlamalyq maqalasy jastarǵa arnalǵany anyq. Óıtkeni, bolashaq — jastardyń qolynda. Qoǵamdyq sanany jańǵyrýdyń basty basymdyǵy ultymyzdyń jahandyq qoǵamdastyqta básekege qabiletti bolýy ekendigi sózsiz. Bul rette ózimizdiń biregeıligimizdi, qundylyqtarymyz ben dástúrimizdi saqtaýǵa tıispiz. Otanyńdy súımeı salt-dástúrińdi saqtaı almaıtyndyǵyńdy da jete túsingen jón», — dep 2008 — 2014 jyldardaǵy oblystyq ishki saıasat basqarmasynyń basshysy — Súleımenova Gúljıan atap ótti. 
Al, 2015-2016 jyldary oblystyq ishki saıasat basqarmasynyń basshysy bolǵan, búgingi kúni oblystyq «Nur Otan» partıasy tóraǵasynyń birinshi orynbasary Ǵalıasqar Sarybaev: «Bilim – búginginiń basty qajettiligi. Dúnıetanymy keń adam ǵana básekege tótep beredi. Kóshbasshymyzdyń óskeleń urpaqty bilimge qushtar bolýǵa úndeýiniń syry osynda. Bilim alýdy kúltke aınaldyrý, basymdyqqa aınaldyrý bizdiń qoǵam úshin óte qajet. Saýatty el ǵana damyǵan 30 eldiń qatarynda bolmaq. Sondyqtan rýhanı baı adam – kez kelgen aqparatty tez qabyldap, zaman talabyna saı jyldam meńgerip, kósh ilgeri júrip otyrmaq», — dedi. 
Ashyq dıalog alańynda Elbasynyń maqalasy qazaq halqyn jarqyn keleshekke bastaıtyn bilim, ǵylym, rýhanıat, týǵan jer, til máselesine qatysty aıtylǵan naqtyly mindetter eldiń ulttyq kodyn aıqyndap, ulttyq bolmysyn saqtap qalýǵa jol ashatyny jóninde sóz qozǵaldy. Qatysýshylar tarapynan «Rýhanı jańǵyrý» qazirgi Qazaqstanǵa qajet ekeni aıtylyp talqylandy.