Memleket basshysy N.Nazarbaevtyń byltyr sáýir aıynda Iran eline saparynan keıin Qazaqstan men Iran kásipkerleriniń arasynda yntymaqtastyq qarym-qatynastar ornaı bastady. Keıin oblys ákimi A.Kólginov bastaǵan bir top delegasıa Iran eline baryp, kásiporyndarmen kelissózder júrgizdi. Nátıjesinde Aqjaıyq aýdanynda ornalasqan «Batys Marka Lamb» JSHS Iran ıslam memleketine jyl sońyna deıin 1500 tonna tońazytylǵan marqa etin eksporttaý jóninde kelisimshartqa qol qoıǵan bolatyn. Shilde aıynda Atyraý áýejaıy arqyly alǵashqy partıa jiberilse, keshe Iran memleketine marqa etiniń ekinshi partıasy jol tartty. Bul joly ónim Tegeranǵa tikeleı Oral halyqaralyq áýejaıy arqyly jiberildi.
«Batys Marka Lamb» JSHS - táýligine 1400 bas marqa soıyp, vakým kaptamasynda bólshektelgen et óndiretin keshen. Atalmysh jobanyń qurylysy 2013 jyly bastalyp, 2015 jyly iske qosylǵan bolatyn. Búginde 80-nen astam adamdy turaqty jumyspen qamtyp otyrǵan kásiporyn respýblıka kóleminde sońǵy tehnologıalarǵa saı usaq mal etin óńdeıtin jáne ónimi eksportqa baǵyttalǵan alǵashqy arnaıy keshen bolyp tabylady.
Kásiporyn byltyrǵy jyly Reseı Federasıasyna 180 tonna marqa mal etin eksporttasa, bıyl jyl sońyna deıin qosymsha taǵy 50 tonna marqa etin jetkizýdi josparlap otyr.
Biz ekologıalyq taza ónim shyǵaramyz. Sondyqtan Iran elinde bizdiń ónim joǵary baǵalanady. Búgin mine, ırandyqtarmen aradaǵy kelisimniń aıasynda ekinshi márte tońazytylǵan et jóneltip otyrmyz. Iran kásipkerleriniń óz talaptary bar. Olarǵa marqa eti kerek, ári erkek mal bolýy qajet. Biz olardyń talabyn tolyq qanaǵattandyra alamyz. Bizdiń ónim sapaǵa qoıylatyn talaptarǵa tolyqtaı jaýap beredi. Al shıkizat máselesinde eshqandaı qıyndyq joq. Oblystyń sharýa qojalyqtarynan, jeke ıeliktegi maldy qabyldaımyz. Barlyq veterınarlyq-sanıtarlyq qadaǵalaý talaptary saqtalalyp, etti eksporttaýǵa memleketten ruqsat alynady. Alda ózge de memleketterge et ónimderin eksporttaý josparymyzda bar, - deıdi «BatysMarkaLamb» JSHS-niń dırektory Rýslan Temirbolat.
Al ırandyq veterınar maman Naser Karımı:
- Aqjaıyq aýdanyndaǵy «Batys Marka Lamb» kompanıasynyń ónimi unady. Barlyq normalar qatań qadaǵalanady eken. Sondyqtan eki el arasyndaǵy iskerlik baılanysty nyǵaıtýǵa tyrystyq, - dep óz pikirimen bólisti.
Mamandar Batys Qazaqstan oblysynyń aýyl sharýashylyǵy salasynyń áleýeti joǵary dep baǵalaıdy. Qazirdiń ózinde óńirimizdiń bul salasyna qyzyǵýshylyq tanytýshy memleketter bar, olarmen seriktestik máselesi jóninde kelisimder júrgizýlýde.
