Ortalyq komýnıkasıalar qyzmetinde ÚEU-nyń atqarylǵan isteri men aldaǵy josparlary talqylandy. Baspasóz jıynda elimizde 1,5 jyldan beri qyzmet atqaryp kele jatqan Qoǵamdyq keńestiń qurylymy týraly aıtylyp, qarasha aıyna josparlanǵan Astanada ótetin respýblıkalyq májilisi belgilendi, dep habarlaıdy Qamshy.kz.
Bul týraly QR Din isteri jáne azamattyq qoǵam vıse-mınıstri Abzal Núkenov jáne Azamattyq qoǵam isteri komıtetiniń tóraıymy Álıa Ǵalymova jýrnalısermen kezdesý barysynda málimdedi. «Memleket pen ÚEU ózara árekettestigi: qazirgi jaǵdaıy men keleshegi» atty baspasóz konferensıada atalǵan mınıstrlik tarapynan atqarylǵan ister týraly aıtyldy.
- Qoǵamdyq keńester ózara qarym-qatynastyń tıimdi mehanızmi bolyp qalyptasýda. Olardyń quqyqtyq bazasyn jetildirý úshin biz barlyq 229 qoǵamdyq keńestiń, ÚEU jáne halyqaralyq uıymdardyń usynystaryn jınaqtadyq. Olardyń negizinde Mınıstrlikpen Qoǵamdyq keńester týraly Tıptik qaǵıda jobasy daıyndaldy, onda qoǵamdyq keńester jumysynyń úrdisteri, sonyń ishinde quramdy qalyptastyrý, otyrystardy ótkizý, sheshimderdi baqylaý úrdisteri egjeı-tegjeıli kórsetilgen. Sonymen qosa, bıylǵy jyly qarashada Qoǵamdyq keńesterdiń alǵashqy Respýblıkalyq Májilisi ótedi. Biz onda zańnamaǵa engizý úshin daıyndalǵan barlyq tolyqtyrýlardy usynatyn bolamyz, - dedi vıse-mınıstr Abzal Núkenov.
Endi ÚEU ózara árekettestigi nátıjesinde ózin qarjylandyrýdyń jańa mehanızmderine kóshedi. Iaǵnı, granttar men premıalar engizildi. Bıyl alǵash ret ÚEU-ǵa syılyqaqy taǵaıyndaý úshin konkýrs ótkizilip jatyr (syılyqaqy mólsheri 2000 AEK). Ázirge ókiletti organǵa syılyqaqy alý úshin barlyǵy 224 tapsyrys kelip túsken. Spıkerler áleýmettik baǵyttar boıynsha 55 granttyq joba iske asyrylǵanyn málimdedi.
Sonymen qatar, Mınıstrlik memlekettik áleýmettik tapsyrys negizinde ÚEU-men jobalyq seriktestikti damytýdy qolǵa aldy. Bıyl 8 ortalyq memlekettik organ jáne jergilikti atqarýshy organdardyń 364-ke jýyq salalyq qurylymdary respýblıka boıynsha ortalyq deńgeıde jalpy sommasy 569,2 mln. teńgeni quraıtyn 43 jobany, jergilikti deńgeıde sommasy 13,9 mlrd. teńge bolatyn 2103 jobany (jergilikti atqarýshy organdardyń málimetteri boıynsha) iske asyryp jatyr.
