Jezqazǵanda Alash alańy jańartyldy. Jaz boıy Qaraǵandy oblysy Jezqazǵan qalasynyń basty alańy Alash alańynda jóndeý jumystary júrip, 8 qyrkúıek – qala kúninde jańarǵan alańnyń ashylý saltanaty ótti. Osy kúni alańǵa ornatylǵan Táýelsizdik monýmenti jurtshylyqqa tanystyryldy, - dep habarlaıdy Qamshy.kz aqparat agenttigi.

Bıyl qalada birshama jańǵyrtý jumystary júrgen. Búdjetten qala joldaryn jóndeý, abattandyrýǵa qyrýar qarjy bólinip, tozyǵy jetken qubyrlar jańartylyp, birneshe shyl jóndeý kórmegen joldarǵa asfált tóselýde. Kógaldandyrý jumystary da qarqyndy júrgen. Qala basshylyǵy osy jumystar aıasynda qaladaǵy Alash alańyn jańartýdy da jón kóripti.

Alańnyń taban joldary, aınalasy túgel jańartylyp, onda Táýelsizdik monýmenti jańa naqyshta boı kótergen. Monýment avtory – Qazaqstan Sýretshiler odaǵynyń múshesi, qaraǵandylyq músinshi Murat Baıysbaı. Monýmenttiń negizgi bóligi – bıiktigi 30 metr bolatyn stella. Ony ornatý barysynda qola, granıt jáne beton qoldanylǵan. Stellanyń ushar basyna samuryq qusy qondyrylǵan. 

– Bıyl qalamyz birshama jańǵyrýdy bastan keshýde. Qala búdjeti tolyǵyp, abattandyrý, kógaldandyrý sharalaryna jetkilikti qarajat bólindi. Sondaı-aq, qalamyzda tuńǵysh ret «Órken» daryndy balalar mektebi ashyldy. Mine, búgin qala kúninde Alash atyn ıelengen alańnyń jańarǵan kelbetine kýá bolyp otyrmyz. Jańarǵan alań qala turǵyndarynyń súıikti ornyna aınalaryna senimim mol, – dedi monýmenttiń ashylýyna oraı ótken saltanatty jıynda sóz sóılegen qala ákimi Batyrlan Ahmetov. Qala basshylyǵynyń bul sheshimin bylaıǵy jurtshylyq ta qýanyshpen qarsy aldy. 

– Elimizdiń ortalyǵynda ornalasqan Jezqazǵanda Alash atyn ıelengen alańmen burynnan maqtanatynbyz. Al, endi osy alańda Táýelsizdik monýmentiniń ashylýy sol maqtanyshymyzdy eselep otyr. Alash arystary ańsaǵan Táýelsizdiktiń sımvoly bolǵan bul monýment qala turǵyndarynyń, ásirese, jastardyń patrıottyq sezimin arttyratyny, elge, jerge degen maqtanysh sezimin týǵyzyp, Otan tarıhyna qurmetin qalyptastyratyny sózsiz, - deıdi Jezqazǵan qalasynyń Qurmetti azamaty, qalalyq qoǵamdyq keńes tóraǵasynyń orynbasary Saǵyndyq Qojamseıitov.

Aıta keterligi, bıyl sondaı-aq, qaladaǵy negizgi alty kósheniń joly kúrdeli jóndeýden ótti. Olardyń ishinde Alash alańynan bastaý alatyn Alasha han dańǵyly da bar. Sondaı-aq, qaladaǵy Jastar saıabaǵynda abattandyrý jumystary jalǵasýda. Qala kúnine arnalǵan saltanatty shara Qazaqstan estrada juldyzdarynyń konserti men merekelik ot shashýǵa ulasty.