Qyrǵyzstanda Saılaý jáne referendým ótkizý jónindegi ortalyq saılaý komısıasy Qyrǵyzstan prezıdenttigine úmitker Ómirbek Babanovtyń Qazaqstan prezıdenti Nursultan Nazarbaevpen kezdesýine baǵa berdi, dep jazady Qamshy.kz aqparat agenttigi. Bul týraly Ortalyq Atqarý Komıtetiniń tóraǵasy Nurjan Shaıldabekova «Azattyq» tilshisine bergen suhbatynda aıtty.

Onyń aıtýynsha, «Saılaý» týraly zańnyń 28-babynda úmitkerlerge sheteldik saıası tulǵalardyń úgit-nasıhatyn paıdalanýǵa tyıym salynǵan. Alaıda Ortalyq Atqarý Komıtetiniń jumys toby atalmysh kezdesý jaıynda Qazaqstan basshysynyń baspasóz qyzmeti aqparat retinde jazǵandyqtan, munda eshqandaı da zań buzýshylyqtyń bolmaǵanyn aıtady. Tóraǵanyń ózi «zań buzýshylyq oryn aldy» deıdi.

«Menińshe, bul – jaýapkershilikten qashýǵa ıtermeleıtin naǵyz is-árekt. Babanovtyń Qazaqstan prezıdentimen kezdesýin zań buzýshylyq dep bilemin», – dedi  Shaıldabekova.

Onyń sózinshe, ózin joǵarǵy laýazymǵa usynyp otyrǵan adam moraldyq tazalyq pen jaýapkershiliktiń úlgisi bolýy kerek.

Aıta keteıik, 19 qyrkúıekte Aqordanyń baspasóz qyzmeti Almatyda Nursultan Nazarbaevtyń «Respýblıka – Ata-jurt» partıasynyń basshysy jáne Qyrǵyzstan prezıdenttigine úmitker Ómirbek Babanovpen kezdeskenin jarıalaǵan.

Kelesi kúni Qyrǵyzstan syrtqy ister mınıstrligi Qazaqstanǵa narazylyq notasyn jiberdi. Bishkek Nazarbaevtyń Qyrǵyzstan prezıdenttigine úmitker Babanovpen kezdesýin «Qyrǵyzstannyń ishki isterine aralasýy jáne saılaýǵa yqpal etý» áreketine balady.

Qazaqstan tarapy óz kezeginde Qyrǵyzstan SİM reaksıasyna tań qalǵanyn jetkizdi. Astana Elbasynyń Ómirbek Babanovpen kezdesýde eshqandaı yqpal jasaý áreketi bolmaǵanyn jetkizdi.