Qyrymda adam quqyqtaryn taptaý aıtarlyqtaı kúsheıgen. Bul týraly 25 qyrkúıekte BUU-nyń jańa baıandamasynda aıtyldy, dep jazady Qamshy.kz aqparat agenttigi.

Sońǵy kezderi Qyrymda adamdardyń joǵalýy, jazyqsyz tutqyndaýlar, azaptaý jáne zańsyz jer aýdarý syndy áreketter jıilegen. Sarapshylardyń pikirinshe, reseılik bıliktiń áreketinen ásirese qyrym tatarlary zardap shekken.

Baıandamada kórsetilgendeı, aneksıalanǵan Qyrymnyń 10 myńdaǵan turǵynyna kúshtep Reseı azamattyǵyn berdi. Azamattyq alýdan bas tartqandardyń jaǵdaıy múshkil boldy. Memlekettik qyzmetkerlerin Reseı azamattyǵyn alýdan bas tartqan jaǵdaıda jumystan shyǵaramyz dep qorqytqan.

«Turatyn jeri bola tura, Reseı azamattyǵy joq adamdar zań aldynda teń emes jáne barlyq quqyqtarynan aıyrylady, - delingen baıanadama mazmunynda, - Olar jerge ıelik ete almaıdy, daýys berý jáne saılaýǵa túsý quqyǵynan aıyrylady, qandaı da bir dinı uıymdarǵa tirkelýge, qoǵamdyq jınalystarǵa qatysýǵa, memlekettik laýazymda bolýǵa jáne jeke kólikti óz atyna tirkeýge tyıym salynady».

Sonymen qosa, tutqyndalǵan nemese tergeý ızolátorynda otyrǵan adamdar halyqaralyq quqyq tájirıbesine qaramastan Reseıge jiberildi. Keı tutqyndarǵa qatygezdik kórsetildi, kem degende úsh adam qaza tapty, ári olarǵa eshqandaı medısınalyq kómek kórsetilmegeni anyqtadly.

Aneksıaǵa qarsy adamdardyń erkin pikir bildirý, beıbit otyrystar ótkizý jáne qandaı da bir dindi ustaný quqyǵynan aıyryldy.