Bı-bı-sı túrli sebeptermen qyzdary men nemereleri Irak pen Sırıaǵa barǵan áıeldermen sóılesti. Kezdesý Sheshenstannyń Máskeýdegi ókildiginde ótti dep jazady Qamshy.kz aqparat agenttigi.
Tamým Shabanova: Men Shabanova Tamým Dashdemırovnamyn. Tórt jyl buryn qyzym turmysqa shyqty. Olar «Túrkıaǵa demalýǵa baramyz. Onda týystarymyz bar» dedi. Meniń qarsylyǵyma qaramastan qyzym men kúıeý balam Túrkıaǵa ketti. Odan keıin 2 aı habarsyz ketti. Men qobaljı bastadym. Bir ýaqytta qyzym habarlasty. «Ana, men bir páterdemin. Munda áıelder kóp. Bizdiń telefondarymyzdy tartyp aldy. Kúıeýim joǵalyp ketti. Onyń qaıda ekenin bilmeımin» dedi. Men qaıda baryp, ne isteý kerektigin bilmedim. Qatty qoryqtym.
Bir aptadan keıin qyzym bir áıelden telefon alyp, jasyryn nomermen habarlasty. «Anashym, ýaıymdama. Barlyǵy jaqsy. Kúıeýim qaıtyp keldi» dedi. Odan keıin qaıta habarsyz ketti. Keıin belgili bolǵandaı, olar Mosýlda bolǵan eken. Sońǵy ret olar 25 mamyrda habarlasty. Sol ýaqytta qyzym sary aýrýmen aýyrǵanyn aıtqan. Ony úı jaǵdaıynda emdegen. Ózderi qorada turǵan. Sońǵy ret habarlasqanda menimen qoshtasqandaı sóılesti. Eki aıdan keıin, 8 shildede kúıeý bala habarlasyp, barlyǵy jaqsy ekenin aıtty. Bul olardyń sońǵy qońyraýy edi.
Zara Ýspanova: Meniń aty-jónim Zara Ýspanova. Turmystaǵy qyzym bar. Olar ákesimen turyp jatqan. Qyzymnyń ákesimen ajyrasqandyqtan bólek turatynbyz. Bir kúni qyzym turmysqa shyqqanyn aıtty. Maǵan qyzymnyń telefon nomerin berdi. Habarlasqanymda eki mınýt qana sóılese aldyq. Ol jylaı bastady. «Anashym, men bilmedim. Men eshteńe bilmedim. Ótinemin kómektesshi» dedi. Boldy. Men qaıta habarlasyp, «qyzymmen sóılestirińdershi» degenimde. Tutqany alǵan orys tildi áıel «endi ol sizdiń qyzyńyz emes. Eger shý kóteretin bolsańyz múlde qyzyńyzben tildestirmeımin» dep jaýap berdi. Men tynyshtalyp, qyzymmen uzaq sóılespeıtinimdi aıtyp, baılanystyrýdy ótindim. Biraq qyzyma telefondy bermedi. Eki, úsh saǵat ótkennen keıin ózderi habarlasty. Men birden telefondy kóterip «Makka, Makka bul sen be?» dep edim, «endi onyń aty Aısha!» dedi. Odan keıin qyzymmen sóılestim. «Men de barlyǵy jaqsy. Ýaıymdama» dep kúldi. Sóılesken ózimniń qyzym edi. Biraq ol ózin múlde basqasha ustady. Bes mınýt sóılestik. Odan keıin jańaǵy áıel telefondy qaıta alyp, «qyzyńyzdyń jaǵdaıy jaqsy ekenin estidińiz ǵoı. Onda barlyǵy jaqsy. Endi habarlaspańyz. Qajet bolsa ózimiz telefon shalamyz» dedi. Bul oqıǵa 2014 jyly 11 qyrkúıekte boldy.
Eki jarym aıdan keıin skaıp arqyly sóılestik. Onyń júzinen, daýsynan bireýden qorqyp turǵanyn baıqadym. «Anashym, barlyǵy durys. Keshirshi. Men ne bolyp jatqanyn bilmedim. Men eshteńe bilmedim. Men jaı ǵana turmysqa shyqtym» dep aıtyp jatqany sol edi, bólmege áıel kirip keldi. Sol ýaqytta qyzym birden daýys yrǵaǵyn ózgertip, «Anashym, men saǵan aıttym ǵoı habarlaspa dep» dedi.
29 tamyzda olar Mosýlǵa bardy. Odan keıin Tall-Afarǵa ketken. Sońǵy ret 29 tamyzda sóılestik. Osy ýaqyt aralyǵynda qyzym balaly boldy. Onyń jasy 2-de. Jarty jyl buryn sóıleskenimde qyzym onyń aýyryp júrgenin aıtqan. Sodan beri habarsyz.
Patımat Salamova: Meniń esimim Patımat. Osyndaǵy áıelderdiń barlyǵynyń máselesi bir. Sondyqtan qyzymnyń oqıǵasyn qysqa ǵana aıtyp óteıin.
Meniń qyzym turmysta. Sırıaǵa birinshi kúıeý balam ketti. Artynan qyzym bardy. Bir balamen qaıtyp kelip, jıenimmen qaıta Sırıaǵa ketti. Men olardy izdep Sırıaǵa bardym. Biraq olardy alyp kele almadym. Kúıeýi ony Mosýlǵa alyp ketipti. Odan keıin taǵy eki balasy dúnıege keldi.
Qyzym sáýirde ózge bireýdiń telefonymen baılanysqa shyqty. Ol kúıeýi qaıtys bolǵanyn jáne úsh balasymen jalǵyz qalǵanyn aıtty. Qolynan kelse úıge oralatynyn jetkizdi.
Osydan keıin onymen baılanysa almadym. Maǵan 4 túrli adamnan qyzym týraly 4 túrli habar kelip tústi. Tórteýi de sumdyq. Derekkózdiń biriniń aıtýynsha, qyzym Irakta quldyqta. Ol jerge qalaı barýy múmkin ekenin bilmeımin. Endi biri 24 áıeldi gazben tunshyqtyrǵanyn, onyń ishinde meniń de qyzym bar ekenin aıtady.
