Ulttyq qaýipsizdik komıtetiniń (UQK) burynǵy tóraǵasy, sottalǵan Nartaı Dútbaevtyń áıeli Halıda Bıchýrına Facebook pen YouTube-te Qazaqstan prezıdenti Nursultan Nazarbaevqa vıdeo úndeý jarıalady. Bıchýrına úndeýinde UQK kúıeýin "kúıeýbalasy men aǵasynyń balasyn qýdalaýdan qutqarý úshin jasamaǵan qylmysyn moınyna alýǵa májbúrlegenin" aıtady. "UQK aıtqan sózinde turmady. Olar dáleldi qoldan jasap, esh kinási joq jastardy arsyzdyqpen sottady. Budan soń Nartaı balalardy qutqarý úshin ǵana kináni moınyna alatyny týraly qysym arqyly bergen jaýaptarynan bas tartty" deıdi Halıda Bıchýrına. Bul týraly Qamshy.kz aqparat agenttigi Azattyq saıtyna silteme jasaı otyryp jazady.
Ol jıeni men kúıeýbalasyn sottaý "kútkendegideı nátıje" bermegendikten, kelesi "yqpal etý tetigi" retinde bıyl 28 qyrkúıekte Nartaı Dútbaevtyń inisi ustalǵanyn aıtady. 56 jastaǵy inisi Rústembek Nurtaevtyń tutqyndalǵany týraly Nartaı Dútbaevtyń Nursultan Nazarbaevqa jazǵan hatynda da aıtylady. Bıchýrına ol hatty Facebook-tegi paraqshasyna saldy.
Dútbaev onda prezıdentke ekinshi qaıtara qaıyrylýyna ózi men inisine qarsy qozǵalǵan, "2000 jáne 2004 jyldary jasaldy delingen, oıdan qurastyrylǵan taǵy bir qylmystyq is" sebep bolǵanyn aıtady. UQK-niń burynǵy basshysy tergeý organdary Rústembek Nurtaevty qylmystyq qýdalaýdan bosatý úshin ózine alǵashqy is boıynsha kinásin moınyna alýdy talap etip otyrǵanyn málimdeıdi.
Nartaı Dútbaev prezıdent Nazarbaevqa buǵan deıin jazǵan haty jetpegenine senimdi bolǵandyqtan taǵy da hat jazýǵa májbúr bolyp otyrǵanyn aıtady jáne ózine qatysty iske aralasýyn suraıdy. Aqmola garnızonynyń áskerı soty 2017 jyly 24 tamyzda Nartaı Dútbaev pen ózge úsh adamdy "memlekettik qupıany jarıalaý" jáne "qyzmet babyn asyra paıdalaný" aıyptary boıynsha uzaq merzimge sottaǵan. Dútbaevtan ózge onyń eki týysy - kúıeýbalasy Nurlan Hasen men aǵasynyń balasy Erlan Nurtaev jáne Raıs Muratov sottalǵan.
Dútbaevtyń týystarynyń Azattyqqa habarlaýynsha, úkimge apelásıalyq shaǵym berilgendikten zańdy kúshine engen joq. Nartaı Dútbaev, burynǵy sheneýnikter Nurlan Hasen men Erlan Nurtaev 2016 jyly jeltoqsanda ustalǵan soń olarǵa memlekettik qupıany jarıalady jáne qyzmet babyn asyra paıdalandy degen aıyptar taǵylǵan. "Dútbaev isine" qatysty tergeý men is materıaly qupıa júrgizildi, sot prosesi jabyq ótti.
Nartaı Dútbaev isiniń qupıalary
Nartaı Dútbaev UQK-ni 2001 jylǵy jeltoqsannan 2006 jylǵy aqpannyń 22-sine deıin basqarǵan. Ol opozısıa jetekshisi Altynbek Sársenbaıulyn qastandyqpen óltirýge UQK-niń "Arystan" arnaıy jasaǵy qyzmetkerleriniń qatysy bary anyqtalǵannan keıin otstavkaǵa ketken. Dútbaev otstavkaǵa ketken soń UQK akademıasynyń basshysy, prezıdent Nursultan Nazarbaevtyń keńesshisi boldy, az ýaqyt "Qazatomónerkásibi" ulttyq kompanıasynyń vıse-prezıdenti qyzmetin atqardy.
Qazıs TOǴYZBAEV
