Nursultan Nazarbaev «Jubanovtar álemi» atty jańa ortalyqty aralap kórdi dep habarlaıdy Qamshy.kz aqparat agentigi Aqordaǵa silteme jasaı otyryp.

Ortalyq ataqty Jubanovtar áýletiniń kórnekti tulǵalarynyń shyǵarmashylyq murasyn dáripteý, sondaı-aq daryndy balalardy oqytý maqsatymen salyndy.  

Memleket basshysyna bul nysannyń qurylysy jeke adamdardyń qarjysy arqyly júrgizilgeni baıandaldy.

Qazaqstan Prezıdenti elimizdiń kórnekti ǵylym jáne óner qaıratkerleri – Jubanovtardyń ómiri men shyǵarmashylyǵyna arnalǵan mýzeıdi aralap kórdi.

Budan bólek, Elbasy oblystyń jurtshylyq ókilderimen kezdesti.

Nursultan Nazarbaev «Rýhanı jańǵyrý» atty baǵdarlamalyq maqalasynda atap kórsetilgen jańǵyrý úderisiniń erekshelikterine toqtaldy.

– Álem kóz aldymyzda ózgerýde, biz sol ózgeristerdiń ortasyndamyz. Jańa ǵylymdar paıda bolyp, tyń kózqaras qalyptasýda. Barlyq reformalar, sonyń ishinde qoǵamdyq sanany jańǵyrtý úderisi zamandastarymyzdy jarqyn bolashaqqa daıyndaý úshin jasalýda, – dedi Qazaqstan Prezıdenti. 

Sondaı-aq, Elbasy Astana, Almaty, Shymkent qalalarymen qatar Aqtóbe de ınovasıa ortalyǵy bolyp, óndiristik, qarjylyq jáne adamı resýrstardy tartatyn faktorǵa aınalýǵa tıis ekendigin erekshe atap ótti.

«Qazaqstanda iri qalalardyń bolǵany durys. Almaty halqynyń sany 1 mıllıon 300 myńnan asty. Astana halqy kún saıyn artyp keledi. Shymkent mıllıonǵa, Aqtóbe halqynyń sany jarty mıllonǵa jetti. Táýelsizdiktiń alǵashqy jyldarynan beri Aqtóbe halqynyń sany eki esege ósti. Buryn 240 myń bolsa, qazir 500 myńǵa jýyqtady. Men bul qalada mıllıon adamnyń turǵanyn qalaımyn. Jańa yqsham aýdandar salynyp jatyr. Adamdar bul óńirge kóship kelip, ómir súrgisi keledi. Bul jerde múmkindik bar. Búgin Aqtóbe feroqorytpa zaýytynda boldym. Jańa zaýytta 700 adam jumys istep jatyr. Zaýyt - Aqtóbe oblysynyń eń iri óndiris oryndarynyń biri. Al Aqtóbe rels-arqalyq zaýyty Qazaqstandaǵy, Ortalyq Azıadaǵy jalǵyz óndiris orny. Biz ındýstrıaldy óndiris oryndaryn salyp, zaýyt, fabırıkalardyń qurylysyn júrgizip jatyrmyz. Jol salynyp jatyr. Aqtóbede gaz bar, Qytaıdan Eýropaǵa baǵyttalǵan jol sizder arqyly ótip jatyr. Kólik bul - ómir. Kólik qozǵalysy bar aýmaqta aýyl bar, jumys tabylady. Ári qaraı bul baǵyttaǵy jumys jalǵasady. Qazaqstannyń barlyq aımaǵy jolmen qamtylady. Jol bul - damý», - dedi Memleket basshysy.

Kezdesý sońynda Nursultan Nazarbaev oblys turyndaryna amandyq pen baq-bereke tilep, elimizdiń órkendeýi jolynda tabysqa jetýlerine nıettestigin bildirdi.