Búgin,  20 qazanda Almaty qalasynyń Tilderdi damytý basqarmasy «Rýhanı jańǵyrý» baǵdarlamasy aıasynda «Tekti sózdiń tóresi - terme» qalalyq baıqaýyn ótkizdi dep habarlaıdy Qamshy.kz aqparat agenttiginiń tilshisi.

«Tekti sózdiń tóresi - terme» baıqaýynyń basty maqsaty - ulttyq qundylyqtardy dáripteý arqyly jastardy qazaqtyń ónerimen sýsyndatý, «jyr-terme» ulttyq janryn jastardyń arasynda keńinen  nasıhattaý. 

 Baıqaýǵa qatysqan jastar Aqtan Kereıulynyń  «Oılamańdar jigitter», «Qalaǵandaryń sóz bolsa», «Jaıyq degen jandy sý», Núrpeıis Baıǵalınniń «Eńbek týraly tolǵaýy», «Shal aqynnyń ósıeti», Maılyqojanyń «Adamnyń bir qyzyǵy bala degen» syndy termelerin oryndady.

 Sonymen birge, óz shyǵarmashylyǵynan terme oryndaǵan qatysýshy úmitkerler de boldy. Ár aýdannan kelgen qatysýshy úmitkerlerdiń kóbi stýdent pen jumys isteıtin jastar.

Osy baıqaýda «Men qazaqpyn» termesin oryndaǵan Báziljanov Birjan esimdi úmitker óziniń bul baıqaýǵa erekshe yqylaspen daıyndalǵanyn jetkizdi:

«Naýryzbaı aýdanynyń atynan kelip otyrmyn. Ózim Jambyl atyndaǵy fılarmonıasynda jumys isteımin. Kental Nazarbekovtiń sózi men ánine jazylǵan «Men qazaqpyn» termesin oryndadym. Baıqaýǵa qatysýdaǵy maqsatym bolashaq jastarǵa qazaqtyń keń baıtaq jeri men eli bar ekenin árqashan jadynda tutsa degen oı» - deıdi arnaıy júlde ıegeri.

   Júldeli oryn alǵan qatysýshylar tıisti dárejedegi dıplomdar men baǵaly syılyqtar, qatysýshylarǵa alǵys hattar men estelik syılyqtarmen marapattaldy. Halyqtyń ónerdi nasıhattaýǵa baǵyttalǵan bul baıqaýdyń jeńimpazdary kelesi  respýblıkalyq kezeńge jiberiledi.