Almaty qalasynda «Bolashaqqa baǵdar: Rýhanı jańǵyrý» baǵdarlamasy aıasynda Birinshi Respýblıkalyq «Kóshpendiler áýeni» dombyra men qobyzda oınaıtyn jas oryndaýshylardyń baıqaýy ótti, dep habarlaıdy Qamshy.kz aqparat agenttigi.

Atalmysh baıqaý 20-22 qazan aralyǵynda P.Chaıkovskıı atyndaǵy Almaty mýzykalyq kolejinde uıymdastyryldy. Atalmysh kolej dırektory, QR eńbek sińirgen mádenıet qaıratkeri Birjan Eskendiruly Hasanǵalıevtiń bastamasymen uıymdastyrylǵan baıqaýǵa elimizdiń túkpir-túkpirinen túrli ónerpazdar óz baqtaryn synaýǵa kelgen.

Kolej dırektory Birjan Eskendiruly búgingi shara jóninde aıtyp ótti.

«Búgin P.Chaıkovskıı atyndaǵy Almaty mýzykalyq kolejinde birinshi respýblıkalyq «Kóshpendiler áýeni» atty baıqaý uıymdastyryp jatyrmyz. Búgin erekshe, ónerge baı kún. Sebebi búgin aldymen uly kompozıtor P.Chaıkovskııǵa arnalǵan eskertkish ashyldy, keıinnen «Kóshpendiler áýeni» atty halyq aspaptarynda oınaıtyn oryndaýshylar baıqaýyn ashtyq. Biz úshin bul – óte qýanyshty jaǵdaı.

Bul sharaǵa birneshe aı boıy biz daıyndyq jumystaryn júrgizdik. Qanshama adam eńbek etti. Sol eńbektiń búgin nátıjesin kórip, kýá bolyp otyrmyz. Aıta keter bolsaq, bıyl bizdiń 85 jyldyq mereıtoıymyz, soǵan da daıyndyq retinde osy syndy sharalardy ótkizip jatyrmyz. Bul jasalynyp jatqan dúnıelerdiń barlyǵy ónerdiń damýyna septigin tıgizedi.

Búgingi sharaǵa kóptegen qonaqtar, belgili tulǵalar keldi. Eskertkishtiń ashylýynda Jubanov atyndaǵy halyq aspaptar orkestri, «Alataý» hor ansambli ózderiniń ónerlerin kórsetti», - deıdi Birjan Eskendiruly Qamshy.kz aqparat agenttiginiń tilshisine bergen suhbatynda.

Belgili bolǵandaı, «Kóshpendiler áýeni» respýblıkalyq baıqaýy úsh jyl qatarynan uıymdastyrylady eken. Sharanyń negizgi maqsaty – halyq aspaptaryna qoldaý kórsetý, olardy dáripteý.

Birjan Eskendirulynyń aıtýynsha, júldeli oryndarǵa ıe bolǵan baıqaý jeńimpazdary qarjylaı syıaqyǵa ıe bolady. Al baıqaýdyń sharty boıynsha, bas júldege tabystalatyn syıaqy ekige bólinedi, onyń jartysy baıqaý jeńimpazynyń ustazyna berilse, qalǵan jartysy oryndaýshyǵa beriledi. Bul – búgingi baıqaýdyń basty ereksheligi bolyp otyr.

«Kóshpendiler áýeni» baıqaýy Almaty qalasynda Qazaqstannyń búkil óńirleriniń basyn qospaq – bizdiń baıqaýymyzǵa qatysý úshin qazaqstandyq mýzykalyq oqý oryndarynyń eń úzdik stýdentteri jınaldy. Birinshiden, Baıqaý Almaty qalasynyń respýblıkanyń mádenı astanasy retindegi mártebesin nyǵaıtýǵa úlesin qosady. Ekinshiden, ulttyq mýzykanyń damýyna jańa serpin berip, dombyra, qobyz ónerine qyzyǵýshylyqty arttyrady, sazgerlerdi ulttyq mýzyka shyǵarýǵa shabyttandyrady», - dep málimdedi ol.

P.Chaıkovskıı atyndaǵy Almaty mýzykalyq kolej oqytýshysy, Uıymdastyrý komıtetiniń múshesi Laýla Chenemısova búgingi sharanyń negizgi mindetteri men talaptaryna baılanysty aıtyp ótti.

«Kóshpendiler áýeni» birinshi Respýblıkalyq oryndaýshylar konkýrsy bizdiń kolejimizidiń dırektory Birjan Eskendirulynyń ıdeıasymen týyndady. Búgingi ótip jatqan sharaǵa negizinen qoldaý kórsetip otyrǵan «Nomad Life» - ómirdi saqtandyrý kompanıasy bolyp tabylady.

Baıqaý eki nomınasıa boıynsha ótedi: qobyz jáne dombyra. Ár nomınasıanyń ózderine jeke berilgen oryndary bar. Al búgingi sharaǵa ádil-qazy retinde kelip otyrǵan kisiler jaıynda aıtar bolsaq, jas oryndaýshylardy baǵalaýǵa elimizdiń tanymal mýzykanttary shaqyrtyldy. Mysaly, belgili qobyzshy Raýshan Mýsahodjaeva, kúıshi, kompozıtor, profesor, QR eńbek sińirgen qaıratkeri Úsenov Ermurat, dombyrashy Murat Abýǵazy syndy elimizge belgili tulǵalar búgingi baıqaý qatysýshylarynyń ónerin baǵalaıdy», - deıdi Laýla Chenemısova.

Onyń aıtýynsha, baıqaýǵa qatysýǵa nıet bildirgender óte kóp, búgingi sharaǵa baǵyn synap kelgenderdiń sany júzge jýyq eken.

Búginnen bastaý alǵan «Kóshpendiler áýeni» baıqaýynyń negizgi mindeti – qazaq ulttyq aspaptarynda mýzykalyq oryndaýdy dáripteý jáne damytý, daryndy balalarǵa qoldaý kórsetý, sonymen qatar, kásibı mýzykalyq-oryndaýshylyq sheberlik deńgeıin arttyrý bolyp otyr.