Áleýmettik jelide jynystyq bopsalaýdy bastan ótkergen áıelder men erkekter #MeToo (#Men de) heshtegi arqyly bastan ótkergen aýyr jaǵdaıyn baıandaǵan. Atalmysh heshteg arqyly álem halyqtary óz oqıǵalarymen bólisti dep jazady Qamshy.kz aqparat agenttigi.

Jaqynda úndistandyq jazýshy óziniń tvıtter paraqshasynda áıelge jasaǵan zorlyq áreketin #IdidThat (#Men soǵan bardym) heshtegi arqyly jazdy.

«Kinámdi moıyndaý ońaıǵa soqpady. Men ókinemin jáne túzelemin dep ýáde beremin...Men onyń qorǵansyz ekenin bildim de ózimdi onyń janynda kúshtirek ekenimdi sezdim...Seni súısem bola ma dep suradym...» dep jazdy Mýmbaı turǵyny Devang Patak.

Devang mundaı qadamǵa Úndistandaǵy «BuzzFeed» portalynyń redaktory Regı Dja óziniń tvıtter paraqshasyna, erlerdiń «Men ózgeremin. Keshirim suraımyn» dep jazýyn surap jazba qaldyrǵannan keıin barǵan.

Aıta keteıik, #MeToo qozǵalysy jeksenbi kúni aktrısa  Alısa Mılanonyń óz basynan ótkergen jaǵdaıdy baıandap jazǵan jazbasynan keıin bastaldy. 1,3 mıllıon adam atalǵan heshteg arqyly Feısbýk, Instagram, Tvıtter áleýmettik jelilerinde jazba qaldyrǵan. Áıelder men erkekter zorlyq-zombylyqty, jynystyq bopsalaýdy bastan ótkergenin jazǵan.

Vox jańalyqtar saıtynyń jýrnalısi Lız Plank zorlyq jasaǵan er adamdardy da sóıletý kerek ekenin jazyp, #HimThough (#Mine ózi de) degen heshtegpen jazba qaldyrdy.

Arab elderinde #Men de heshtegi paıda boldy. Ony kóbine Feısbýkte qoldanady.

Italıa halqy #MeToo men qosa #quellavoltache (#Solkezde) heshtegimen jazbalar qaldyrýda.

Germanıadaǵy #IchAuch (#Men de) heshtegi jynystyq bopsalaýdy bastan ótkergen adamdardyń oqıǵasyn jınaqtaǵan.

Fransıada #Balancetonporc heshtegi (#ShoshqanyElgeTanyt) arqyly qorlyq kórsetken adamdardyń esimin ataýǵa shaqyrady.