«Qazaqstandy uly el dep sanamaıtynyn, biraq prezıdent Nursultan Nazarbaevty uly adam dep tanıtyn, Qazaqstannyń Reseımen birigýin suraǵan» Ermek Taıshybekov merziminen buryn bostandyqqa shyqty.

Bul týraly bloger Rınat Kıbraev vıdeo suhbaty arqyly habarlady. 

Atalmysh jańalyqty reseılik BAQ «Jaqsy jańalyq», «Qazaqstandaǵy orys fobıasyna qarsy kúresker bostandyqqa shyqty» degen taqyryppen atoılap  jappaı jazyp jatyr. Olar úshin jaqsy jańalyq bolmaı qaıtsin. Sebebi Ermek Taıshybekov Qazaqstan men Reseıdiń birigýin  qoldaǵandardyń biri de biregeıi.  

Ermek Taıshybekov áleýmettik jelide Qazaqstan men Reseı birikse Nursultan Nazarbaev «birlesken memlekettiń» prezıdenti, al Reseı prezıdenti Vladımır Pýtın – arnaıy qyzmet basshysy bolǵany jón» dep  jazǵan.

Qazaq jigitiniń ata-babalarymyzdyń qanymen, janymen kelgen táýelsizdik, árbir qazaqqa amanat etip berilgen Qazaqstan atty keń baıtaq jerdi Reseıge berýdi suraǵan qazaq jigitiniń mundaı qadamyn qatań synǵa alǵandardyń qarasy kóp bolǵany beseneden belgili.

Atalmysh oılarymen qazaq halqynyń qytyǵyna tıip, ashýyn keltirgen Ermek Taıshybekov ultaralyq arazdyq týdyrdy degen aıyppen sottalǵan. Jambyl oblysy Qordaı aýdandyq soty ony 4 jylǵa bas bostandyǵynan aıyryp, jazasyn jalpy tártiptegi túrmede óteýge úkim etken.

Ermek Toıshybekov onyń eki jylyn otyrda da, shartty túrde merziminen buryn bostandyqqa shyqty.

Reseıge birigýdi suraǵan, ultarazdyqty qozdyrǵan adam eki jyl  ǵana túrmede otyryp bostandyqqa shyqsa, nelikten Maks Boqaev, Talǵant Aıan, Aron Atabek, Seıtqazy Mataevtardyń áli kúnge deıin temir tordyń arǵy jaǵynda otyrǵany túsiniksiz.

Otanyn uly el dep sanamaıtyn jáne táýelsiz Qazaqstandy ózgeniń bodandyǵyna berýge ázir adamnyń bostandyqta, babalarymyzdyń naızanyń ushymen, bilektiń kúshimen kóziniń qarashyǵyndaı qorǵap, keler urpaqqa, bizge amanat etip jetkizgen jerinde emin-erkin júrip, aýasyn tynystap júrgende, nelikten Qazaqstannyń jeri jalǵa berilmeýi úshin kúresken azamattar qapasta otyrýy kerek?!

Kindik qany tamǵan jerin, búlkil bolmysy, tarıhy, mádenıeti, ádebıeti, dili, dini sińgen Otanyn uly dep sanamaıtyn adamnyń Qazaqstanǵa zıanyn tıgizbese, paıda ákelmeıtini haq.

Ermek Taıshybekov bostandyqqa shyqqannan keıin bloger Rınat Kıbraev odan suhbat alyp, ony jelige jarıalady. 

Rınat Kıbravetyń ózi de ótken jyly "jezókshelikpen aınalysýǵa arnalǵan prıtondar uıymdastyrý nemese olardy ustaý jáne sýtener bolý" aıybymen sottalǵan. Ol bir jarym jyl bas bostandyǵynan aıyrý jazasynyń úshten birin ótep, jazanyń qalǵan bóligin aıyppul tóleýmen aýystyrý týraly sot sheshimi kúshine engen.