Qostanaıdaǵy Nazarbaev zıatkerlik mektebiniń oqýshylary áleýmettik mańyzy zor birneshe joba oılap tapty. Jas ǵalymdardyń jańalyǵy kemtar jandardyń múmkindigin keńeıtýge baǵyttalyp otyr.
Oqýshylar ózderi qurastyrǵan «aqyldy kıimderdiń» bolashaqta suranysqa ıe bolaryna senimdi. Abylaıhan Ádilbek pen Raýhat Arqulov «aqyldy kıim» jobasyn 9-synyp oqyp júrgende qolǵa aldy. Kóz maıyn taýysqan 4 jylǵy eńbek óz jemisin berdi. Áýeldegi «aqyldy qolǵap», endi taqıamen tolyqty. Shekesine qondyrǵy ornatylǵan baskıim zaǵıp jandarǵa arnalǵan.
Abylaıhan Ádilbek, Nazarbaev Zıatkerlik mektebiniń 12-synyp oqýshysy:
«Belgili bir nysan osy taqıanyń últrajabdyǵyna jaqyndaǵan kezde ol óz ıesine aqparat beredi. Osy dybys arqyly ıesi aqparatty qabyldap, aldynda bir nárse turǵany jaıly jáne onyń qozǵalysyn basqa burý kerek ekenin oılap otyrady».
Oqýshylardyń basty armany – múgedekterdiń múmkindigin keńeıtý. Mylqaýlar men sańyraýlarǵa arnalǵan qolǵap ta osy maqsatta ómirge kelgen. Munda qoldanýshy óz oıyn shaǵyn ekran arqyly bildire alady.
Raýhat Arqulov, Nazarbaev Zıatkerlik mektebiniń 12-synyp oqýshysy:
«Qolǵaptyń barmaqtardyń bir-birine tıýi arqyly biz belgili bir áripterdi jaza alamyz. Iaǵnı tolyǵymen alpys árip jazýǵa bolady. Bul qazaqsha da, oryssha da, aǵylshynsha da álipbıge jetedi».
Jas ǵalymdar jańalyǵyn Qostanaıdaǵy zaǵıptar qoǵamyna aparyp tanystyrdy. Janary sýalǵan jandar oqýshylar jasaǵan «aqyldy taqıany» kıip, tekserip te kórdi.
Qylyshbaı Bekmaǵanbetovtyń sý qarańǵy bolǵanyna – 12 jyl. Alǵashqy dana taqıa oǵan syıǵa berildi.
Qylyshbaı Bekmaǵanbetov, İ toptaǵy múgedek:
«Bul bizge óte qajet qurylǵy eken. Úsh jarym metr qashyqtyqtan eskertip, dybys beredi. Jalǵyz júrgende kómekshi. Bolashaqta daýystaıtyn qylyp jetildirse, tipten tamasha bolar edi».
«Aqyldy taqıa» arzandyǵymen de erekshelenedi. Qondyrǵy ornatylǵan baskıimniń quny myń jarym teńge shamasynda. Qostanaı oblystyq zaǵıptar qoǵamynda 700-den astam múshe bar ekenin eskersek, keleshekte onyń suranysqa ıe bolary anyq. Oqýshylar eńbekterin jetildirý ústinde.
