Mańǵystaýda sheneýnik 50-ge jýyq jer ýchaskelerin sharýashylyqqa zańsyz bergen. Bul týraly Mańǵystaý oblysy óńirlik komýnıkasıalar qyzmetinde ótken brıfıńte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń basshysy Nurgúl Jannazarova málimdedi,-dep jazady Qamshy.kz aqparat agenttigi.
Onyń aıtýynsha, Qaraqıa aýdandyq «jer qatynastary, sáýlet jáne qala qurylysy bólimi» memlekettik mekemesiniń basshysy A.Tolegenov Quryq selosy aýmaǵynan 50-ge jýyq jeke jáne zańdy tulǵalarǵa qosalqy sharýashylyǵyn júrgizý úshin jer ýchaskelerin zańsyz berip kelgen.
Bul derekti prokýratýra organdary anyqtaǵan soń, zań buzýshylyqty joıý týraly usynysy negizinde sheneýnikke qatysty tártiptik is qaralyp, sheshim shyǵarylǵan. Oryn alǵan zań buzýshylyqtar memlekettik qyzmetke kir keltiretin teris qylyq bolyp dárejelenip, Ádep jónindegi keńestiń sheshimimen bólim basshysy qyzmetinen qýyldy.
Jyl basynan beri Ádep jónindegi keńestiń 11 májilisi ótkizilip, 55 másele qaraldy, onyń 40-y memlekettik qyzmetshilerge qatysty qozǵalǵan tártiptik ister.
Tártiptik jaza qoldaný jóninde memlekettik organdardyń basshylaryna 20 usynymdar joldanyp, memlekettik qyzmetke kir keltiretin tártiptik teris qylyqtarǵa jol bergeni úshin 6 qyzmetshige - «qyzmetine tolyq sáıkes emestigi týraly eskertý» berilse, 2 qyzmetshi «atqaratyn qyzmetinen bosatyldy». Qalǵan 12 qyzmetshige Ádep kodeksimen 8 – eskertý, 2 – «sógis», 2 – «qatań sógis» túrinde jazalar qoldanyldy.
Sonymen qatar, memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti memlekettik qyzmet, memlekettik qyzmetshilerdiń ádep erejeleri, memlekettik kórsetiletin qyzmetter jáne sybaılas jemqorlyq profılaktıkasy máseleleri boıynsha jumys isteıtin 1424 Koll-ortalyǵynyń jáne departamenttiń 8 (7292) 30-30-39 senim telefonymen qatar, jańadan 8 (707) 170-14-24 (WhatsApp qosymshasy arqyly SMS jáne aýdıo habarlamalar úshin) nómirli Mańǵystaý oblysy boıynsha shuǵyl jelisiniń ashylǵandyǵyn habarlady.
