Jeksenbilik mektepter elimizdegi ár ult ókilderiniń óz ana tilin, tarıhy men dástúrin tereń tanýǵa, sonymen qatar memlekettik tildi tegin oqyp-úırenýge barynsha jaǵdaı jasap keledi. Óskemendegi «Edelveıs» qonaq úı kesheniniń májilis zalynda «Jeksenbilik mektepterde qazaq tili men ulttyq (ana) tilderdi jedeldete oqytýdaǵy ádis, tájirıbe, ınovasıa» taqyrybynda respýblıkalyq semınar-trenıng ótti.
Semınar etnomádenı ortalyqtar janyndaǵy jeksenbilik mektepterde qazaq jáne ana tilderin oqytýdyń ádistemesin jetildirý, ozyq tájirıbeni zerdeleý jáne qorytý, oqytýdyń ınovasıalyq ádisteri men tehnologıalaryn tájirıbege engizý maqsatynda uıymdastyrylǵan. Atalmysh sharaǵa Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory, fılologıa ǵylymdarynyń kandıdaty Erbol Tileshov, «Memlekettik tildi úıretý elıtalyq kýrsy» mádenı mekemesiniń dırektory Sáýle Baqtybaeva, Kóptildi bilim berýdi damytý ortalyǵynyń dırektory, dosent Sáýle Asanbaeva, ádisker ǵalymdar, til mamandary men jeksenbilik mektep oqytýshylary qatysty.
-Elbasy júrgizip otyrǵan memlekettik saıasattyń arqasynda elimizde Qazaqstan halyqy Assambleıasy jumys isteıdi. Jeksenbilik mektep muǵalimderine arnalǵan bul semınardyń máni zor. Sheberlik sabaqtaryndaǵy ádis-tásilder men ozyq tájirıbeler oń nátıjesin beredi dep senemin. Memlekettik tildi biletin, syılaıtyn halyqqa aınalsaq, eńbegimizdiń jemisi sol bolmaq,-dedi Erbol Erdembekuly.
Semınar barysynda ádisker — ǵalymdar tilderdi oqytýdyń tıimdi ádis-tásilderimen jáne tehnologıalarymen bólisti. Jeksenbilik mektep oqytýshylary men respýblıkaǵa belgili úzdik ádiskerler panoramalyq jáne sheberlik sabaqtaryn kórsetti.
Sondaı-aq, qazaq tilimen qatar koreı, ózbek, dúngen, grek, túrik, ázirbaıjan, balqar tili muǵalimderiniń qarqyndy oqytýda ınterbelsendi ádisterdi qoldaný jáne oqytýdaǵy ınovasıalyq tehnologıalar jaıly baıandamalary tyńdaldy.
-Men Tarazdaǵy №4 mektepte ózbek tili men ádebıetinen jáne 1996 jyldan beri jeksenbilik mektepte memlekettik til-qazaq tilimen qatar tájik, ózbek tilderinen sabaq berip kelemin. Mundaı semınar-trenıngterdiń biz úshin mańyzy zor. Til bilimi salasyndaǵy bilikti mamandarmen keńesemiz, ózge óńirlerdegi jeksenbilik mektepterdiń ustazdarymen suhbattasyp, tájirıbe almasamyz. Túrli sheberlik sabaqtary ótip jatyr. Ár adam óz ultynyń tilin, mádenıetin bilýi tıis. Jeksenbilik mektepte til úırenem deýshilerdiń jasyna shekteý joq. Tek mektep oqýshylary ǵana emes, ana tilin tereń bilgisi keletin eresekter de keledi,-deıdi tarazdyq ustaz Ulbolsyn Hadyrbaeva.
Elimizde bir shańyraqtyń astynda tatý-tátti ómir súrip jatqan barsha ulttar men ulystardyń tili men mádenıetin saqtaý úshin memleket tarapynan múmkindiginshe barlyq jaǵdaı jasalǵan. Integrasıa men jahandaný zamanynda til saıasatyn júzege asyrýda, úshtildilikti damytý baǵytynda naqty sharalar júzege asyrylýda. Osy oraıda Óskemendegi «Vozrojdenıe» jeksenbilik mektebiniń jumysyn erekshe atap ótýge bolady. Memlekettik tilmen qatar toǵyz tildi tegin úırenýge múmkindik beretin, óziniń jeke ǵımaraty men jarǵysy bar bul bilim ordasy – respýblıkadaǵy eń myqty jeksenbilik mektepterdiń birinen sanalady.
Aıjanat Baqytqyzy
