Búgin Palata Spıkeri Nurlan Nyǵmatýlınniń tóraǵalyǵymen ótken Májilistiń jalpy otyrysynda depýtattar «Standarttaý týraly» zań jobasyn birinshi oqylymda talqylady, dep jazady Qamshy.kz aqparat agenttigi.

Onda halyq qalaýlylary zań jobasynyń 14-babyna nazar aýdardy. Standarttaý jónindegi qujattardy zańdy jáne jeke tulǵalardyń taratýy ulttyq standarttaý organymen kelisim bolǵan kezde júzege asyrý múmkindigi aıtylǵan.

Osy rette depýtattar tarapynan deldaldar sany ósip, ol standartqa qoljetimdilik qyzmetiniń qymbattaýyna jol ashýy múmkin degen qaýip aıtyldy. Sondaı-aq, zań jobasynda standarttaý týraly Ulttyq organmen kelisim-shart jasasý úshin zańdy jáne jeke tulǵalarǵa qoıylatyn talaptar naqty kórsetilmegen.

Májilis Tóraǵasy atalǵan bapta qalyptastyrýdy, júrgizýdi jáne súıemeldeýdi ulttyq standarttaý organy júrgizetin normatıvtik tehıkalyq qujattardyń biryńǵaı memlekettik qoryna nazar aýdara kelip:

- Atalǵan aqparattyq júıeni jalpyǵa ortaq qoljetimdi etýge ne kedergi bolyp otyr? Árıne, standarttaý ınstıtýty odan túsken qarjymen aqparattyq júıeni júrgizý boıynsha shyǵyndaryn jabatyny túsinikti. Alaıda, ony taratý úshin arada deldaldyń bolýy qandaı qajettilikten týyp otyr? Onyń ústine zań jobasynda olardy tańdaý boıynsha, qyzmet quny boıynsha, tipti, aqparattardyń shynaıylyǵyna jaýapkershilik týrasynan eshqandaı ólshem, talap belgilenbegen,-dedi Nurlan Nyǵmatýlın.

Zań jobasynyń úkimettik nusqasynda bul norma «deldal úshin», «kádimgi paıda tabatyn oryn ashatynyn» aıtqan Májilis Tóraǵasy:

- Jumys toby ekinshi oqylymǵa deıin osy bapty qarap, mańyzdylyǵyna qatysty naqty sheshim qabyldaýy kerek,-dedi.

Aıta keteıik, zań jobasynyń negizgi maqsaty sýbektilerdiń jáne olardyń standarttaý salasyndaǵy qyzmetti júzege asyrý prosesindegi qatynastarynyń jıyntyǵy retinde ulttyq standarttaý júıesin qalyptastyrý bolyp tabylady, onda standarttaýdyń maqsattary, qaǵıdattary, standarttaý sýbektileriniń quzyreti men olardyń ózara is-qımyl rásimderi naqty aıqyndalǵan.