Shymkentte «Eki juldyz» saltanat saraıynda Elordasy - Astananyń 20 jyldyq mereıtoıyna oraı saltanatty is-shara uıymdastyryldy, dep jazady Qamshy.kz aqparat agenttigi.
Saltanatty keshte qonaqtar Astana týraly foto jáne kilem kórmesin tamashalady. Sonymen qatar, eldiń áleýmettik jáne ekonomıkalyq damýyna úles qosyp, halyq qajetine jaraıtyn nysandar salǵan azamattardyń eńbegi eskerildi. Jaǵdaıy qarapaıym otbasylarǵa kómek qolyn sozǵan qoǵam belsendileri men birqatar kásipkerler marapattaldy.
Aıta ketsek, Prezıdent Nursultan Nazarbaev qazaq eliniń astanasyn Almatydan Aqmolaǵa kóshirý jónindegi tarıhı Jarlyqqa qol qoıdy. Bul kún – tek elorda turǵyndarynyń ǵana emes, muqym qazaqqa tán mereıli mereke. Kemeńger saıasatkerdiń osynaý kóregen sheshiminiń durys ekenin búginde ýaqyttyń ózi dáleldep berdi. Kóp uzamaı Astana elimizdiń ekonomıkalyq, saıası, mádenı ómiriniń qaınaǵan ortasyna aınaldy. Saltanatty sharanyń álqıssasy Astana týraly ázirlengen arnaıy beınefılmmen bastaldy.
Budan soń óńir basshysy elimizdiń damýy men ósip-órkendeýine eleýli úles qosqan 20 mesenatty marapattady. Olarǵa «Oblysqa sińirgen eńbegi úshin» medali men Alǵys hat tabys etildi. Eńbegi eskerilgenderdiń ishinde Shymkent qalalyq máslıhatynyń depýtaty Ǵanı Ahmetbaevtyń qaıyrymdy isin aıryqsha atap ótildi.
Qaıyrymdylyq pen mesenattyq qyzmetti damytý jumystaryna óńirdegi túrli ult pen ulys ókilderi de úles qosyp júr. Olarǵa Elbasynyń atynan Qazaqstan halqy Assambleıasynyń «Jomart jan» tósbelgisi taǵyldy. Latıpsha Asanov osy marapatqa ıe boldy.
