Shymkentte quqyq qorǵaý qyzmet ortalyǵy ashyldy, dep habarlaıdy Qamshy.kz aqparat agenttigi.
«Bir tereze» qaǵıdasymen jumys isteıtin bul ortalyqta 11 mekemeniń mamandary azamattarǵa 22 kásibı quqyqtyq kómekti aqysyz kórsetetin bolady. Munda tájirıbeli prokýrorlar, advokattar, medıatorlar, notarıýstar, memlekettik kiris organdary men ákimdik, probasıa qyzmetkerleri halyqtyń shaǵym-aryzdaryna jaýap beredi.
Ortalyq «Nur Otan» partıasy oblystyq fılıalynyń ǵımaratynda ornalasqan. Mekeme qazirgi zamanǵa saı ınjenerlik-tehnıkalyq qondyrǵylarmen jaraqtalǵan. Elektrondy kezek júıesi de engizilgen. Kútý zaly, sonymen qatar óz-ózine qyzmet kórsetý sektory da jumys isteıdi.
«Quqyq qorǵaý qyzmetteri» ortalyǵynyń basshysy Bolat Baıneevtyń aıtýynsha, ortalyqtyń maqsaty ári qaǵıdasy – prokýratýranyń arnaıy alańynda barlyq mamandarmen azamattarǵa keń aýqymdy tegin quqyqtyq kómekter kórsetý.
