Almaty ákimi Baýyrjan Baıbek ýnıversıtettiń tehnoparki men «jasyl tehnologıa» ortalyǵynda bolyp, Ál-Farabı atyndaǵy QazUÝ-degi ınovasıalyq jobalarmen tanysty. Mundaǵy jobalardyń basym bóligi Astanada ótken «EKSPO-2017» halyqaralyq mamandandyrylǵan kórmede alǵash ret kórsetilgen bolatyn.
Búgingi kúni ulttyq ýnıversıtet aýmaǵynda jel, kún, geotermal, bıogaz, sýtegi jáne gıdro energıalardy alý úshin eksperımentaldy alańdar jasalǵan. Sonyń arqasynda stýdentter energıanyń balamaly túrin alý joldarymen praktıka júzinde tanysýda.
Megapolıs basshysyna «jasyl tehnologıa» ortalyǵyndaǵy energıa tıimdiligin júzege asyrǵan jylyjaıda agrotehnıkanyń zamanaýı tásilderi arqyly jemis-kókónisti vırýssyz ósirýdiń ádisteri kórsetildi. Ál-Farabı atyndaǵy QazUÝ-niń rektory Ǵalym Mutanov JOO mańyndaǵy kampýsta ekologıalyq turaqty jáne jaıly «jasyl keńistiktiń» paıda bolǵanyn aıtty.
«Kereńqulaq» ózeniniń jaǵalaýyn abattandyrý jumystary aıaqtalyp qaldy ári munda sý tazartatyn júıe de bar. Ózen sýy «Akvaponıka» jasandy ekojúıede qoldanylady. Bul aımaq stýdentter men qala turǵyndary úshin jaıly demalys ornyna aınalady. Iaǵnı, atalǵan aýmaq stýdentter úshin praktıkalyq baza bolyp, baǵaly balyqtar men dekoratıvti ósimdikter ósiriledi»,- dedi Ǵ.Mutanov.
Almaty ákimi «EKSPO-2017» ótkizýge yqpal etken ǵylym men ınovasıalyq jobalardy damytý men engizýge memleket tarapynan qoldaý kórsetilip jatqanyn atap ótti. Qazirgi kezde Almatyda jas startaperlerge jáne olardyń jobalaryn komersıalandyrýǵa erekshe nazar aýdarylýda.
Ýnıversıtetti aralap shyqqan Baýyrjan Baıbek ákimdik tıisti basqarlamaryna Ál - Farabı atyndaǵy QazUÝ-degi qyzyq jobalardy zertteýdi ári tıimdi qoldanýdy tapsyrdy. Sonyń ishinde, jylý elektrstansıalarynyń ekologıalyq - ekonomıkalyq kórsetkishin arttyratyn plazmaly jylý júıesi, TQQ ýtılızasıalaý jáne qurylys pen óndiriste paıdalanylatyn polıefırli smol óndirisi jobalary tıimdi ekenin kórsetti.
