Qazaqstan musylmandary YIII quryltaıynda jańadan saılanǵan Bas múftı Serikbaı qajy Orazuly óziniń mindetteri týraly aıtty.
Bas múftı óziniń aldyna qoıylǵan maqsat-mindetter týraly tilge tıek etti.
«Men úshin bul tosyn sheshim. Ózimdi kómekshi, orynbasar retinde jaqsy sezinemin. Biraq tańdaý osyndaı bolǵandyqtan, bul úlken amanatty barlyq áriptesterimmen abyroımen atqaramyn dep oılaımyn. Aldaǵy 5 jylda aldymyzǵa qoıylǵan barsha bastamalardy odan ári oryndap, damytý jolynda eńbek etemin. Qurandy býkvalızm tanymymen túsinýge tosqaýyl qoıyp, quran túsindirmelerin paıymdy túsindirý jolynda qoǵam men dindarlar arasynda baılanys arttyrýǵa jumys jasaıtyn bolamyz. Úlken qyzmetti bar kúsh jigerimmen, áriptesterimniń kómegimen, qoǵamdaǵy durys jan-jaqty bolǵan ımmamdar ortasyn qalyptastyra otyryp, bizdiń halqymyzda ata-baba qalyptasqan dástúrli dinı tanym mektebin jańǵyrtyp, alǵa qoıǵan maqsatty birge atqaramyz. Qazaqstan Musylmandary tuǵyrnamasynda da jolymyzdy aıqyndap alǵanbyz. Jat pıǵyldy ortaǵa jol bermeımiz. Oǵan qarsy tura alatyn ımýnıtet Qazaqstan musylmandary ıslamtaný ınstıtýtynyń róli kúshti, bilim tájirıbeleri jeterlik dep oılaımyn», - dedi Bas múftı.
Aıta ketý kerek, búgin Almatyda Qazaqstan musylmandarynyń YIII quryltaıy ótti. Jıyn barysynda quryltaıǵa qatysýshy 300-den astam delegat Serikbaı qajy Orazulynyń kandıdatýrasyn biraýyzdan qoldady. Jańa Bas múftı 4 jyl, ıaǵnı 2018-2022 jyldar aralyǵynda qyzmet atqaratyn bolady. Sondaı-aq Bas múftı orynbasarlary laýazymyna Naýryzbaı qajy Taǵanuly, Alaý Ádilbaev, Baýyrjan Esmahanov saılandy.
Buǵan deıin Bas múftı qyzmetin atqaryp kelgen Erjan Maıamerov óz erkimen qyzmetinen ketti.
Meshittegi jamaǵattyń aýyzbirshiligin arttyryp, biregeı qulshylyq jasaý tártibin ornatý maqsatynda QMDB meshitteriniń Erejesi qabyldandy. 2015 jyly aqpanda elimizde tuńǵysh ret «Islam - beıbitshilik pen kelisim dini» taqyrybynda İ respýblıkalyq ımamdar forýmy ótti. Shara aıasynda «Qazaqstan musylmandary dinı basqarmasynyń tuǵyrnamasy», «Din qyzmetkeriniń etıkasy», «Imamnyń tulǵalyq kelbeti», «Musylman kelbeti» atty mańyzdy qujattar qabyldandy.
«QMDB janyndaǵy Ǵulamalar keńesiniń jańa quramy jasaqtaldy. Keńeste 17 ǵalym jumys isteıdi. Onyń 9-y ǵylym doktory, qalǵany magıstrler. Biz Dinı basqarma qyzmeti aıasynda 2014-2015 jyldy «Din men dástúr» jyly dep jarıaladyq. QMDB janynan dinı bilimi tereń, tájirıbesi mol bilikti din ǵalymdarynyń basyn biriktirgen aqparattyq nasıhat toptary quryldy. Olar halyq arasynda túsindirý jumystaryn júrgizdi. Jat aǵymǵa ketken jastarymyz dástúrli hanafı mazhabyn tańdap, ortamyzǵa oralýda. 2017 jyly atqarylǵan jumystar nátıjesinde jat aǵymnyń arbaýynda júrgen 940 azamat hanafı mazhabyn tańdap, qatarymyzǵa qosyldy. 2013-2017 jyldar aralyǵynda jalpy sany 4967 adam radıkaldy raıynan qaıtty», -dedi Erjan Malǵajyuly.
Aıta ketsek, Qazaqstan musylmandary dinı basqarmasynyń keńsesi 2014 jyly Almatydan Astana qalasyna kóshirilgen bolatyn.
