Almatynyń týrısik áleýetiniń arqasynda qala búdjetine qansha qarjy túsip otyr? Bul suraqqa qaladaǵy qoǵamdyq keńes otyrysynda jaýap berildi.
Keńes músheleri aldynda qalalyq Týrızm jáne syrtqy baılanys basqarmasynyń basshysy Erlan Jaılaýbaı esep berdi.
«Týrızm salasy qalanyń Jalpy aımaqtyq ónimine 1,5% ǵana úles qosyp otyr. Elimizdiń JİÓ-de týrızm salasy 1%-dy alyp otyr. Al álemdik tájirıbede týrızm JİÓ-niń 10 paıyzyn ákeledi. Byltyr álemde 1,2 mlrd adam saıahattaǵan. Bul sandarǵa qarasaq, bizge áli de kóp jumys jasaý kerektigi kórinip tur. Uıymdasqan týrızm úlesi - 20%. 2016 jyly Qazaqstanǵa 6 mln sheteldik kelgen. Almatyda 400 000 shetel azamaty bolsa, olardyń 56 myńy ǵana týrıs retinde saıahattap kelgen», - dedi ol.
Onyń aıtýynsha, Almaty qalasynda Reseı, Iran, Qytaı, Úndistan elderinen týrıs tartýdy qolǵa almaq.
«Biz júrgizgen saraptamaǵa sáıkes saýalnama alynǵan 20 myń adam Almaty qalasyn jeke týrısik oryn dep emes, Ortalyq Azıany túgel qarastyratyny baıqaldy. Álemdik týrısik uıymymen birige otyryp Jibek joly» baǵdarlamasyn jasap jatyrmyz. Týrısik marshrýt Almatydan bastalyp, Ózbekstan, Qyrǵyzstan elderiniń qalalaryn aralap, Almatyǵa qaıta oralady. Basty maqsat - qyzmet sapasyn jaqsartý», - dedi Erlan Jaılaýbaı.
Basqarma basshysy Almatynyń týrısik ereksheligin de atap ótti.
«Almaty - taza Azıa nemese Eýropa qalasy emes. Ol kosmopolıttik aımaqtyq sımbıozy, IýNESKO muralary bar, Uly Jibek jolynda ornalasqan erekshe qala. Munda 30 jýyq eldiń as máziri usynylady. Munda taý týrızmi men medısınalyq týrızmdi damytýǵa bar kúshimizdi salamyz», - dedi E.Jaılaýbaı.
Aıta ketý kerek, burynyraq Almatyny shetelge tanytýǵa qansha qarjy bólingenin habarlaǵan bolatynbyz.
Almatynyń týrısik áleýeti týraly ótken qoǵamdyq keńeste otyrysynda ekskýrsıalyq avtobýs baǵdarlarynyń damýy týraly másele kóterildi.
Qalalyq Týrızm jáne syrtqy baılanys basqarmasynyń basshysy Erlan Jaılaýbaıdyń aıtýynsha, ekskýrsıalyq avtobýstarǵa arnaıy turaq bólýge jáne avtobýs jolaǵymen júrýge ruqsat berý týraly aýyzsha kelisim jasalǵan.
«Qazir mamandarmen birige otyryp turaq oryndaryn belgiledik. Ákimshilik polısıamen aýyzsha kelisim bar. Memorandýmǵa qol qoıýǵa ázirlik bar. Sonymen qatar, ekskýrsıalyq avtobýstarǵa arnaıy avtobýs jolaǵymen júrýge ruqsat beretin jol qozǵalysy erejelerine ózgeris engizemiz. Keler týrısik maýsymnyń basynda jumás aıaqtalady», - dedi Erlan Jaılaýbaı.
«SpesTehParkıng» kompanıasymen júrgizilip jatqan kelisim barysynda ekskýrsıalyq avtobýstarǵa kem degende bir oryn qaldyrý múmkindigin qarastyrylýda.
Onyń aıtýynsha, qazir qalada jańa týrısik avtobýs baǵdarlary jasalyp jatyr.
«Elektrobýstarǵa suranys kóp. Almatyda eki baǵytta týrısik elektrobýs júrip tur. Kólikter Smart-týrızm kompanıasynyń aýdıogıdterimen jabdyqtalǵan. 1 500 teńgege kez-kelgen adam Almatyny aralaı alady»,- dedi Erlan Jaılaýbaı.
Aıta ketý kerek, týrısik baǵyttaǵy qos elektroavtobýs 13 qazanda jolǵa shyqqan bolatyn.
