Almaty qalasy «Ramada Almaty» qonaq úıinde «Rýhanı jańǵyrý» baǵdarlamasy aıasynda Almaty qalasynyń belsendi azamattarynyń forýmy ótti.
Forýmnyń basty maqsaty – halyqtyń azamattyq belsendiligin arttyrý, qoǵamdyq jáne qaıyrymdylyq qyzmetti dáripteý boldy. Almatyqalasynyń belsendi azamattaryna arnalǵan forýmǵa memlekettik organdardyń ókilderi, iri kásipkerler, mesenattar, tarıhshylar, mádenıet jáne sport qaıratkerleri, úkimettik emes uıymdardyń ókilderi men eriktiler toby qatysty.
Forým aıasynda ómirlik belsendi ustanymy bar Almaty qalasynyń azamattary marapattarǵa ıe boldy.
Elbasy Nursultan Nazarbaev “Rýhanı jańǵyrý” baǵdarlamasynda: “Týǵan jerine kómek jasaǵan jandardy qurmetteýdiń túrli joldaryn tabý kerek” dep atap kórsetken bolatyn.
Atalǵan forým óz aldyna Almaty qalasynyń damýyna úles qosqan azamattardy marapattaı otyryp turǵyndardyń qoǵamdyq belsendiligin arttyrý, azamattardyń ózin-ózi damytý múmkindikterin ashý, megapolısti damytýǵa degen jeke qyzyǵýshylyǵyna qoldaý kórsetý mindetterin júzege asyrýdy maqsat etken bolatyn. Jıynda atalǵan maqsattar men mindetter tolyǵymen júzege asty dep aıtýǵa negiz bar.
“Ramada Almaty” qonaq úıiniń kameralyq zalynda Almaty qalasynyń belsendi azamattarynyń jumystary qoıylǵan kórme boldy. Al “NOMAD” zalynda elý úmitkerdiń ishinen iriktelip shyqqan eń úzdik jeti azamat “Almaty qalasynyń eń belsendi azamaty” nomınasıasymen marapattaldy.
“Almatyda jyl saıyn osyǵan uqsas úkimettik emes uıymdardyń forýmy ótedi. Úkimettik emes uıymdardyń sany jóninen, azamattyq belsendilik jaǵynan da Almaty qalasy aldyńǵy orynda. Qazirdiń ózinde qalamyzda 5 myńǵa jýq úkimettik emes uıymdar qyzmet etedi. Osynyń ózi azamattyq belsendiliktiń joǵary dárejede ekenin tanytady. Qoǵamdaǵy belsendi azamattardyń eńbegin eshkim elep-eskere bermeıdi. Olar da óz qyzmeti úshin marapat talap etpeıtin erikti tulǵalar. Alaıda, bizdiń qoǵam úshin olardyń eńbegi óte mańyzdy. Sondyqtan, búgin qoǵam belsendilerin marapattaý úshin osynda shaqyryp otyrmyz”, -dedi Almaty qalasy ishki saıasat basqarmasynyń basshysy Sydyqov Nurlan Erbolatuly.
Almaty qalasynyń belsendi azamaty atanǵan úzdik 7 belsendiniń qatarynda nebári 9 jastaǵy Davıd te bar. Ol №68 qazaq-nemis gımnazıasynyń 3 synybynda oqıdy. Davıd óz úıiniń aýlasyn qoqystan tazartyp, Almaty qalasy turǵyndary arasynda áleýmettik jelide aksıa uıymdastyrǵan.
Davıd Almaty qalasyndaǵy “Qazaqfılm” yqshamaýdanynda turady. Ol óz aýlasyn qoqystan tazartqan soń, kórshi úıdiń aýlasyndaǵy qoqystardy da jınaýǵa kirisken. Osylaısha, árkim tazalyqty ózinen jáne óziniń aınalasynan bastaý kerek degendi alǵa tartqan 9 jasar qala qaharmany laıyqty marapatqa ıe boldy. Sondaı-aq, Davıd bos ýaqytynda sýret salýdy unatady eken.
“Barshańyzǵa raqmet! Men kórshi aýlany qoqystan tazartqanda, tym bolmasa ózimiz ómir súretin, ózimiz júrip-turatyn aýmaq taza bolsyn degen nıetpen istedim. Men kishkentaımyn, sondyqtan jasaǵan isim de shaǵyn. Ózderińiz oılap qarańyzdarshy, bir kósheler taza bolyp turǵanda, siz de óz kósheńizdiń taza bolǵanyn qalaısyz ǵoı?! Munyń bári óz qolymyzda! Meniń árbir bastamama qoldaý kórsetkeni úshin ózimniń ata-anam men jaqyndaryma alǵysymdy bildiremin. Qalanyń tazalyǵy árbir adamnyń tazalyǵynan bastalatynyn umytpasaq eken deımin”, -dedi jas belsendi.
Davıdtiń bul eńbegine jıyndaǵy qaýym “Búgingi kúnniń kishkentaı batyry” degen baǵa berdi.
