2016 jyly tamyz aıynda Balqash qalasynda top bolyp zorlaý isi boıynsha shyqqan sot úkimi ózgertilmedi dep habarlaıdy juma kúni sotqa silteme jasaǵan jergilikti agenttikter. Balqash qalalyq soty qazan aıynda bul is boıynsha jergilikti eki turǵyndy kináli dep tanyp, 12 jylǵa bas bostandyǵynan aıyrý jazasyn kesken, Qamshy.kz aqparat agenttigi Azattyqqa súıenip jazady. 

Qaraǵandy oblystyq sotynyń habarlaýynsha, apelásıalyq alqa sýdıalary taraptardyń eshqaısysynyń talaptaryn qanaǵattandyrmaý týraly sheshim shyǵarǵan. Sottalýshylar apelásıalyq shaǵymynda aıyptaý úkimin joıyp, ózderin aqtaýdy suraǵan. Al jábirlenýshiniń advokaty sottalýshylarǵa kesilgen jazany qatańdatýdy jáne azamattyq shaǵymdy qanaǵattandyrý úshin alǵashqy sot ınstansıasynyń sheshimin qaıta qaraýdy surap shaǵymdanǵan bolatyn.

«Apelásıalyq alqa taraptardyń shaǵymyn qarap, Balqash qalalyq sotynyń úkimin ózgertýden bas tartty» dep habarlady Balqash qalalyq sotynyń baspasóz qyzmeti.

Jábirlenýshiniń advokaty Aıman Omarova apelásıalyq sot sheshimine qarsy Joǵarǵy sotqa aryzdanatynyn aıtty. Advokattyń sózinshe, jábirlenýshi buǵan deıin sottalýshylardan ózine 30 mıllıon teńge kóleminde moraldyq shyǵyn tóletý týraly azamattyq talap-aryzyn qaıta kótermek nıette ekenin aıtty.

Jábirlenýshiniń sózine qaraǵanda, eki er adam 2016 jyly tamyzda ózin zıratqa aparyp qorlap, uryp-soqqan. Ol ózin qorlaǵandardan áreń degende qashyp shyǵyp, polısıaǵa aryzdanǵan. Bul is boıynsha bastalǵan tergeý áýeli jabylyp, keıin oqıǵa BAQ-ta jarıalanǵan soń qaıta tergelip, sotqa jetken. Sot bul is boıynsha kýáger, jábirlenýshiniń tanysyn sottalýshylar paıdasyna jalǵan kýálik berdi dep tanyǵan. Sot oǵan raqymshylyq jasap, eki jarym jyl merzimge shartty jaza taǵaıyndaǵan.