Osy jyl saıası sahnada da, shoý-bıznes salasynda da jańalyqtarǵa, jańa esimderge toly boldy. Halyqaralyq arenada túrli ózgerister oryn aldy, el prezıdentteri aýysty, buryn tanylmaı júrgender ataqqa ıe bolyp, talanttardy el moıyndady.

Qamshy.kz aqparat agenttigi 2017 jyly tanymaldylyqqa ıe bolǵan, halyqtyń kózine túsip, el eleýlisine aınalǵan adamdardyń tizimin jasap kórdi.

DONALD TRAMP

2017 jyldyń 20 qańtarynda AQSH tarıhynda saıası jańalyq boldy: 45-prezıdent bılikke keldi.

Buryndary kópshilik  Donald Trampty amerıkalyq kásipker retinde tanıtyn, tipti keıbireýler ony múldem bilmeıtin de edi. Búginde halyqaralyq jańalyqtardyń teń jartysy osy tulǵanyń famılıasymen tyǵyz baılanysty.

Buǵan deıin saıasatker, qoǵam qaıratkeri retinde tanymal bolǵan Tramp AQSH teleradıo salasynda ataqty tulǵa, jazýshy. Sonymen qatar AQSH-taǵy iri qurylys Trump Organization kompanıasynyń prezıdenti jáne álem boıynsha kazıno men qonaq úıleri bar Trump Entertainment Resorts kompanıasynyń negizin qalaýshy. Alaıda, 45-prezıdent atanǵannan keıin ǵana, búkil álem ony tanı bastady.

EMMANÝEL MAKRON

Taǵy bir halyqaralyq kókjıektegi jańa esim - Emmanýel Makron. Fransıanyń burynǵy saıasatkeri E.Makron endi  Fransıanyń 25-prezıdenti. «Alǵa Respýblıka!» saıası partıasynyń lıderi. 2017 jyly ótken prezıdenttik saılaýda jeńiske jetip, Fransıanyń eń jas prezıdenti atandy.

 LÝIS FONSI

Osy jyldyń «hıt» ánine aınalǵan Despacito-nyń oryndaýshysy Lýıs Fonsı Máskeýge konsert beretinin habarlaǵanda onyń tyńdarmandary barlyq bıletterdi sanaýly saǵattarda satyp alǵan eken. Biraq, keıinnen tyńdarmandar pýertorıkolyq ánshiniń bir jarym saǵattyq konsertinde  Despacito ánin  ǵana tyńdaımyz ba degen oıǵa kelip, ánshiniń taǵy 9 álbomy bar ekenin bilgende tańyrqap qalǵan. Shyn máninde, 2017 jyly Youtube jelisinde beınebaıany 4,5 mlrd kórilim jınaǵan Lýıs Fonsıdi osy jyly juldyzy jarqyrap, baǵy janǵan adam retinde aıtýǵa bolady.

DIMASH QUDAIBERGEN

Qazaqstan men TMD elderinde buryndary da  tanymaldylyqqa ıe Dımash osy jyly Qytaıǵa ǵana emes, barlyq álemge esimin áıgili etti.   Dımash Vıtebsk qalasynda ótken XXIV Halyqaralyq estradalyq án oryndaýshylar «Slaván bazary-2015» baıqaýynda Gran-prı jeńip alǵan, «Halyq súıiktisi» Ulttyq syılyǵynyń laýreaty, «Qazaqstan halqynyń birligin nyǵaıtýǵa laıyqty úles qosqany úshin» Qazaqstan Respýblıkasynyń Prezıdenti Qurmet gramotasymen marapattalǵan, «ABU TV song» halyqaralyq festıvaliniń qatysýshysy. Osy jyly Qytaıda ótken "I am a Singer" jobasynda ekinshi oryn aldy.

 DANELIA TÓLESHOVA

11 jastaǵy almatylyq Danelıa Tóleshova osy jyldyń úzdik talanty degen atqa laıyqty dep tanyldy.  Ol Ýkraınada ótken «Daýys.Balalar» jobasynyń jeńimpazy. Tym jas bolýyna qaramastan, qyzdyń daýsy men án aıtý sheberligi, shyn máninde tańqaldyrarlyq.  «Meniń armanym—óz salamnyń kásibı mamany bolý»-deıdi jetkinshek.

ABZAL MYRZASH

12 jastaǵy výnderkınd bala Abzal Myrzash qazir Qazaq-brıtan tehnıkalyq ýnıversıtetiniń stýdenti. Jaqynda atalǵan oqý ornynyń rektory Abzalǵa  tegin oqýǵa arnalǵan grant tabystaǵan. Mektep baǵdarlamasyn birneshe jylda úırenip shyqqan Abzal búgin 1-kýrs stýdenti jáne jarqyn bolashaǵyna degen senimi mol.

JULDYZ ÁBDİKÁRİMOVA

Juldyz Ábdikárimovanyń akterlik sheberligi týraly biraz syn da, min de, madaqtaýlarda aıtyldy. Osy ýaqytqa deıin otbasylyq ómirden qol úzbeı júrgen jas aktrısa tek 2017 jyly ǵana óz ónerin pash etip, juldyzy jarqyrap shyǵa keldi.

Osy jyldy qorytyndylaı kele, jyl barysynda talantymen, eńbegimen, aqyl-bilimimen, áreketterimen tanylǵan esimderdiń birsypyrasyn qarastyrdyq. Aldaǵy ýaqytta da bul esimderdiń  tizimi  tolyǵa túsedi degen úmit bar.  Al siz, osy jyly tanylǵan jańa esimderge kimderdi jatqyzar edińiz?

NAZERKE MUSA