Aqtóbede ótken aıtys ǵasyrlar qoınaýynan kele jatqan qasıetti ónerdiń ómirsheńdigin taǵy bir dáleldep berdi. Halyqtyń sóz saıysyna degen ystyq yqylasyna qylaýdaı syzat túsip kórgen emes.
Aıtys arqyly kıeli sózdiń qudireti burynǵy bıiktegen ústine bıiktep aspandap keledi. Qarap tursań, sarqylmas qaınar bulaq sekildi quıylyp jatqan qazyna. Osyǵan taǵy bir kóz jetkizip qaıttym.
Tildiń baılyǵy – ulttyń ishki kúsh-qýatynyń belgisi.
Kórgenine kórkem sózben baǵa bere biletin halyqtyń parasat-paıymy bıik bolady.
Halyqtyq tárbıege ýyzynan jaryǵan, kisiliktiń tuma bulaǵynan qanyp ishken adam ǵana taýyp aıtylǵan ýájge qonaq berip, sóz dodasynda olqy túskenin moıyndaıdy. Kúndelikti turmysta kópe-kórineý qısyq qaqqan shegesin moıyndamaı jatatyndar bolmaı ma. Oǵan qaraǵanda, sharshy toptyń aldynda, shabyt býyp otyrǵan jerinde, shaýyp kele jatqan tulpardyń basyn tartqandaı bul áreketti qalaı erlik demessiń.
Qazaqtyń sóziniń qadiri bar jerde, ulttyń bolmys-bitimi jarqyraı kórinis beredi. Osyny taǵy bir uqqandaı boldym.
Táýbe, til baılyǵy shuraıly, oıy sulý ul-qyzdar qatary tolyǵyp keledi. Talantty jastardyń ósip kele jatqany kóz qýantady. Shúkirshilik eter jónimiz bar, óıtkeni barlyq ýaqytta birdeı bulaı boldy dep aıtýǵa bola ma. Shyqqyr kóz ben kereń bolǵyr qulaq baıaǵyda úlkenderdiń: «Basymyzǵa quran oqıtyn molda bolar ma eken», – dep jylaǵanyn kórgen de, estigen de. Ashshy shyndyq. Aıtys osyndaı aýyrtpalyqtardyń arasynan tot baspaıtyn aq almastaı jarqyldap jetti.
Ata-babamyzdan kele jatqan asyl ónerdiń arnasy sýalmaǵan eken. Qoshemetpen quptaıtyn halqy bar, jelmen jarysqan júırikteı talantty jastar shoǵyry qalyptasqan. Kózge túsip daralanyp qalǵandary aıtys ótken saıyn jańa qyrynan tanylyp jarqyrap jatsa, ár sóz saıysynda bir juldyz jarqyrap janady. Bul joly da solaı boldy.
Bir aýyz sózben aıtsam, Aqtóbede tógilgen marjan jyr, túıindi tolǵaý meni osylaı qanattandyrdy.
«Altyn dombyra» Jandarbek Bulǵaqovtyń qanjyǵasyna baılandy. Qutty bolsyn!
Qanyńdy qozdyryp, janyńa jiger beretin rýhty báıgeni «kórgen de armanda, kórmegen de armanda» ǵoı dep oılaımyn. Aıtys óneri qur qyzyǵýshylyqpen qarap artynan umytyp júre beretin «birkúndik shoýdan» aıyrmasy hatqa túsip qana qoımaı, ǵylym pánine aınaldy. Aldy Muqtar Áýezovten bastalyp, aıaǵy búgingi jas ǵalymdarǵa deıin jalyqpaı qalam terbep keledi. Jan-jaqty taldanyp zerttelýde. Ár aıtysker aqynnyń maqam úlgisinen bastap, sóz saptaýy, sahnada ózin ustaýy degen dúnıeler týraly biraz pikirler aıtyldy. Jazylar da.
Aıtys óneriniń ıesi – halyq. Elimiz aman turǵanda bul ónerdiń abyroıy asqaq, mereıi ústem bola beredi. Sondyqtan, «kún sóngenshe azat el bolaıyq».
Aqyn, jazýshy, QR Memlekettik syılyǵynyń laýreaty,
Halyqaralyq «Alash» syılyǵynyń laýreaty
Qajyǵalı Muhambetqalıuly
