Aýa raıynyń kúrt qubylýyna (kóktaıǵaq) baılanysty 5 oblysta avtojoldar jabyldy. Bul týraly Qamshy.kz aqparat agenttigi QR İİM Tótenshe jaǵdaılar komıtetine silteme jasap habarlaıdy.

Qaraǵandy oblysynda avtokóliktiń barlyq túrleri boıynsha barlyq baǵyttarǵa qozǵalys shekteldi. Pavlodar oblysynda respýblıkalyq mańyzy bar «Pavlodar - Sharbaqty» (0-112 km, Pavlodar - RF shekarasy) avtojolynda, Pavlodar - Qaraǵand jáne Pavlodar - SHQO shekarasy baǵyttarynda joldar avtokóliktiń barlyq túrleri boıynsha barlyq baǵyttarǵa qozǵalys shektelgen.

Shyǵys Qazaqstan oblysynda aýa raıynyń kúrt qıyndaýyna baılanysty (qar, kóktaıǵaq) respýblıkalyq mańyzy bar «Omby - Maıqapshaǵaı» (585-733 km, Pavlodar oblysynyń shekarasy - Semeı) avtojoly kóliktiń barlyq túri úshin jabyldy.

Budan tys, oblystyq mańyzy bar «Semeı - Kýrchatov» (4-130 km) avtojoly ýchaskesindegi qozǵalys kóliktiń barlyq túri úshin shekteldi. Aqmola oblysynda   avtokóliktiń barlyq túrleri boıynsha respýblıkalyq mańyzy bar «Ekaterınbýrg-Almaty» (Arshaly kentinen Qaraǵandy oblysyna deıingi aýmaq, 1330-1353 km) tas jolynda qozǵalys shektelgen.

Almaty oblysynda respýblıkalyq mańyzy bar Almaty - Óskemen jolynyń 558-615 kılometrleri aralyǵyndaǵy ýchaske jolaýshy jáne júk avtokólikteri úshin jabyq.