Muhtar Áýezov atyndaǵy Qazaq memlekettik akademıalyq drama teatrynda Aıdana Alamannyń «Júregimniń ıesi» psıhofızıkalyq qoıylymynyń premerasy ótti dep habarlaıdy Qamshy.kz aqparat agenttigi.
«Júregimniń ıesi» – jas býynnyń týyndysy. Jas dramatýrg Aıdana Alamannyń pesasy boıynsha jas rejıser Árıdash Ospanbaeva sahnalaǵan qoıylymda teatrdyń jas býyn akterleri oınady.
Qoıylymnyń maǵynasyna úńilsek, jastardyń, ásirese qyzdardyń otbasyn qura almaý sebebi men jar tańdaý, ómirlik serik tabýda aldynan shyǵatyn máselelerdi qarastyrady.
Qoıylymda oınaǵan jastardyń ónerine, emosıany jetkize bilý qabiletine tánti bolasyń. Súıekten ótetin sózderin estip otyryp, ózińdi izdeısiń. İshki jan dúnıeńmen úndesetin, syrt kelbeti de nazardan tys qalmaıtyn, qaltasy da juqa emes jigittiń tóresin ne serisin keziktirý, tańdaý jolynda «erte týyp, kesh qalyp» qoıǵan jannyń ókinishin, úmitin sezesiń. Teatrdyń az sózben adam sanasyna sıgnal berip, oı salatyny belgili. Mán-maǵynasyna kelgende kópshilikke bereri bar qoıylym.
Degenmen teatrǵa tek ómirdi ózinshe tanyp, ońy men solyn ajyrata biletin tulǵalar ǵana barmaıdy. Jasóspirimder de ónerdiń qudiretin tanýda áste artta qalǵan emes. Qoıylymnyń premerasyna jınalǵandardyń ishinde jastardyń qarasy qalyń bolǵanyn aıta ketken de jón bolar.
Atalmysh qoıylym buryn sońdy teatrda sahnalanbaǵan jańa stılmen keldi desek te bolady. Jalańashtanǵan, ishkıimmen júrgen jastardy kıno, áleýmettik jelide maqsatty túrde bolmasa da, jıi kóremiz. Al teatr sahnasynda boıjetkenniń sheshinýi, ishkıimmen ǵana qalýy kózge túrpideı tıedi. El aldynda sheshinip abyroı tapqan adamdy qaıdan kórdińiz? Jigittiń qyz ústindegi kıimin túgel sheship tastaýy jastardy nege baýlıdy? Qyz ben jigittiń bir-birine degen yntyq sezimin ádettegiden ózgeshe etip kórsetý, naqtyraq aıtsaq, qushyrlana súıdirip, bir-biriniń ústinen ótkizip, arly-berli aýnatyp qoıý qandaı tárbıe beredi?
Teatrǵa barǵan kórermen qarbalas jumystan demalyp, tynyǵýǵa, rýhanı baıý úshin barady. Al kóz aldynda sheshinip, ishkıimmen bılep júrgen boıjetkenge bireý tik qaraýǵa ımenedi. Qoıylymnyń bereri mol ekenin sóz basynda da aıtyp óttik, alaıda sahnaǵa laıyqtalǵan kıimdi nege paıdalanbasqa? Qoıylym bastalǵannan-aq bir top qyzdyń jaltyraǵan sany kózińe jarq-jurq etedi. Basy osylaı bolsa, sońy qalaı bolar eken deısiń.
Árıne, bizdiń aıtýymyz paryz, sheshim shyǵarý árkimniń óz erkinde. Qoıylymǵa kózi qaraqty kórermen ýaqyt óte kele óz baǵasyn bereri haq. Ol úshin teatrǵa baryńyz, qurmetti oqyrman!
