Qarly boran Atyraýdy da aınalyp ótpedi. Ótken túnde qalanyń komýnaldyq qyzmetteri qaýyrt jumys istedi, dep habarlaıdy Qamshy.kz aqparat agenttigi  «QazAqparat» málimetine súıenip.

«Qalada 12 qańtar kúni tús aýa qar jaýa bastady. Sınoptıkter tańǵa deıin tolastamaıdy dep boljam jasady. Sondyqtan Atyraý qalasynyń ákimi Serik Shápkenovtiń tapsyrmasymen «Arnaıy avtobaza» JSHS-nyń qar kúreıtin tehnıkalary bes topqa bólinip, jumys istedi. Kóktaıǵaqtyń aldyn alý maqsatynda kópirler men joldarǵa úsh rezervýar qum septi. Barlyǵy 28 arnaıy tehnıka jumyldyryldy. Tańǵa deıin qalanyń ishindegi joldarmen qosa, qala mańyndaǵy aýyldyq okrýgterdiń de joldary qardan tazartyldy», - dep málimdeme jasady qala ákimdiginiń baspasóz qyzmeti.

Qazir qar toqtady. Qardan tazartý jumystary jalǵasyp jatyr.