Qamshy.kz aqparat agenttigi Appaq Sábıt degen laqap atpen tanymal Sábıtbek Ómirzaqov bastaǵan qylmystyq toptan zábir kórip, densaýlyǵynan aırylǵan qyzylordalyq Nurlan Turmanov týraly jazǵan edi. 2013 jyly bolǵan bul oqıǵanyń áli kúnge núktesi qoıylǵan joq. Nurlan Turmanov jergilikti quzyrly organdardan bastap joǵarǵy sotqa deıin shaǵym túsirgen. Jábirlenýshi Appaq Sábıtke berilgen 4 jyl jaza merzimin az dep sanaıdy. Ol endi bul isti jyly jaýyp qoıa salmaı, qaıtadan kóterip otyr.

Qamshy.kz portaly – erkin aqparat alańy.  Atalmysh iske qatysty pikir bildiremin degen quzyrly organdar nemese jaýapty tulǵalar bolsa, árdaıym minberimiz daıyn ekenin málimdeımiz.

Saıtymyzǵa shyqqan maqalada qaraqshylardyń Nurlan Turmanovty aıaýsyz soqqyǵa jyǵyp, odan 20 myń AQSH dollaryn bopsalaǵany búge-shigesine deıin jazylǵan. Jábirlenýshiniń sózinshe, Appaq Sábıt ony las tirlikterge ıtermelep, ózimen birge zańsyz munaı tasymaldaý isine kúshtep kóndirmek bolǵan. Tergeý barysynda Sábıtbek Ómirzaqovtyń budan da ózge aýyr qylmystarǵa qatysy bary anyqtalǵan.

– Nebir qylmys jasap, kóptiń kóz jasyn arqalaǵan Appaq Sábıt ózine laıyq jazasyn almaı, nebári tórt jylǵa ǵana bas bostandyǵynan aıyryldy, – dep qynjylady Nurlan Turmanov.

Appaq Sábıttiń kezinde nemen aınalysqanyn Nurlan Turmanov jaqsy biledi eken. Onyń aıtýynsha, uıymdasqan qylmystyq top munaı urlaǵan, kásipkerlerdi bopsalaǵan, túrli kafe, restoran ıelerinen aqsha soryp, kónbegenderin «syndyryp tastaǵan». Al olardyń kópshiligi Appaq Sábıtten japa shekkenin aıtýǵa qorqady.

Nurlan Turmanovtyń aıtýynsha, Sábıtbek Ómirzaqovtyń tórt ret adam bopsalaǵany dáleldenipti. Alaıda sot Sábıtbek Ómirzaqovty tórt-aq jylǵa bas bostandyǵynan aıyrýmen shektelgen eken.

– QR zańy boıynsha adam bopsalaýǵa taǵaıyndalatyn jaza 7 jyldan bastalady. Tórt ret mundaı qylmysqa qatysy bar adamdy ne sebepti tórt-aq jylǵa sottaıdy. Munyń bári joǵarydan sheshilip otyr, – deıdi Nurlan Turmanov.

Nurlannyń isi boıynsha tergeý de júrgizilmegen. Basynda «Buzaqylyq» babymen qylmystyq is qozǵalǵanymen, dálel jetkiliksiz degen jeleýmen ony da jaýyp tastaǵan.

Ádildik izdep, tabanynan tozǵan Nurlan Turmanov bul isti qarap, Appaq Sábıtke jeńil jaza taǵaıyndaǵan zań ókilin QR Qylmystyq Kodeksin burmalaǵany úshin jaýapkershilikke tartyp, aıyptaýshy prokýrordy da qyzmetinen bosatýdy talap etip otyr.

Saıtymyzda birneshe ret jarıalanǵan maqalalarda Nurlan Turmanovtyń alty ret Elbasyna úndeý salyp, Ulttyq qaýipsizdik komıtetine birneshe hat joldaǵanyn, talaı quzyrly mekemeniń tabaldyryǵyn tozdyrǵanyn aıtqanbyz.

«Qyzylorda polısıasy men prokýratýrasy qylmys álemin qamqorlyǵyna alǵan ba?» atty maqalada oqıǵanyń qalaı bolǵany egjeı-tegjeıli baıandalǵan. Nurlan Turmanovtyń aıtýynsha, Appaq Sábıt óziniń sybaılastarymen birge ony bir tún boıy qatty azaptaǵan, «otbasyńdy óltiremiz» dep qorqytqan.  Jábirlenýshi Nurlan Turmanov: «Soǵan qaramastan, qaraqshynyń bul qylmysyna zań oryndary kózjumbaılyq tanytty. Appaq Sábıt pen Qaraǵandynyń taǵy bir qylmyskeri Aıdos Berkinbaevtyń joǵary jaqta «kókeleri» bar, solar meniń aryzymdy basyp tastap otyr», – dep kúdiktenedi.

– Nege sot meniń isimdi qozǵamaıdy? Onyń ústinen bopsalaýǵa qatysty jazylǵan aryz-shaǵymdardy qaraıdy da, menikine kóńil bólmeıdi? Sebebi meniń isimdi qozǵasa, kóp adam qyzmetinen ketedi. Appaq Sábıtpen birge qylmysqa qatysy bar laýazymdy adamdar da ornyn bosatady. Mysaly, meniń isim bir ret qaralǵan kezde oblys prokýrorynyń orynbasary jumystan qýyldy, – deıdi Nurlan Turmanov.

Áleýmettik jelide taraǵan vıdeodan Appaq Sábıttiń túrmede shalqyp ómir súrip jatqany baıqalady. Aldynda dastarhan jaınap tur, ózi qymyz shaıqap otyr. Quddy bir restoran dersiń.

Nurlan Turmanovtyń sózinshe, Appaq Sábıttiń bostandyqta júrgen inileri men basqa da adamdary onyń qylmystyq áreketterin iske asyryp júr. Olar kontrabandamen, Baıqońyrdan túrli sapaly metaldardy tasymaldaýmen aınalysatyn kórinedi.

Óz otbasyn, óz quqyǵyn qorǵamaq bolyp ádildik izdegen Nurlan Turman redaksıamyzǵa birneshe ret habarlasqan edi. Biz osynyń barlyǵyn negizge alyp, quzyrly organdarǵa birneshe saýal joldadyq.

– Meniń isimdi qozǵasa, Appaq Sábıtke jeti jyl qosady. Sebebi eń aýyr qylmysy bolyp turǵany – meniń isim, qalǵany – bolmashy ǵana nárseler. Al maǵan kórsetken qorlyǵy jabýly kúıinde qalsa, bir jyldan keıin-aq bosap shyǵýǵa múmkindigi bar, – deıdi jábirlenýshi.

Nurlan Turmanov Elbasy Nursultan Nazarbaevtan, UQQ tóraǵasy Kárim Másimovten jáne Bas prokýror Qaırat Qojamjarovtan kómek suraıdy.

– Qansha ýaqyt ótse de, meniń aryzym ne sebepti qaralmaı kele jatyr? Qylmyskerler ózderine laıyq jazasyn almaı ma?

QR Zańy kúshtilerdiń yrqyna kóne bere me? Qashan ádildik ornaıdy? - dep kúıinedi Nurlan Turmanov.