Iran astanasy Tegeran qalasynda jeńil atletıkadan VIII jabyq keshendegi Azıa chempıonaty ótti. Oǵan Qazaqstan quramasy da qatysyp, sátti óner kórsetti, dep jazady Qamshy.kz aqparat agenttigi QR jeńil atletıka federasıasynyń baspasóz qyzmetine silteme jasap.
Azıa chempıonatynan Qazaqstan quramasy jalpy 12 medal jeńip aldy. Onyń jeteýi altyn, tórteýi kúmis, bireýi qola.
Azıa chempıonatynyń sońǵy kúninde 4h400 metrlik estafetadan qyzdar altyn alsa, jigitter Katardy alǵa jiberip, kúmis júldege ıe boldy.
Ulttyq quramanyń aǵa bapkeri Lúbov Nıkıtenko estafeta kezinde qyzdardan Vıktorıa Zábkına, Elına Mıhına, Svetlana Golendova, Adelına Ahmetovaǵa senim artty.
Ashhabadtaǵy Azıa oıyndarynda qolda turǵan jeńisten tehnıkalyq qatelikterge baılanysty aıyrylyp qalǵan edi. Osy joly ondaı qatelikter oryn alǵan joq. Bizdiń qyzdar 3:41.67 mınýtta márege jetti. Ekinshi oryndaǵy Iran qyzdary 10 sekýndqa qalyp qoıdy. Úzdik úshtikti Túrkimenstan qorytyndylady.
Jigitterden jalpy sany 6 komanda qatysty. Qazaqstan namysyn Andreı Sokolov, Sergeı Zaıkov, Dmıtrıı Koblov, Mıhaıl qorǵady. Chempıon atanǵan Katar quramasy márege 3:10.08 mınýtta jetse, Qazaqstan quramasynyń nátıjesi – 3:11.68 mınýt. Úshinshi orynǵa jergilikti Iran quramasy turaqtady – 3:11. 74.
Sondaı-aq 1500 metrge júgirýden Tatána Neroznak kúmis júlde enshiledi. Tatána 1 aqpanda 3000 metrge júgirýden bas júlde alǵan bolatyn. Búgin 1500 metrge júgirýden Shrı-Lanka sportshysyna ese jiberdi. Qostanaılyq atlet 1500 metrdi 4.28.20 mınýtta júgirip ótti. Úshinshi oryn Thı Oan Ngýenge (Vetnam) buıyrdy.
Osylaısha, Neroznak sporttyq karerasynda jabyq keshendegi Azıa chempıonatynyń barlyq júldesine ıe bolyp úlgerdi. Ol buǵan deıin 2014 jáne 2016 jyldary ótken Azıa chempıonatynda 800 metrge júgirýden qola júlde alǵan edi. 1 aqpanda 3000 metrde chempıon boldy. Búgin kúmis júlde buıyrdy.
Aıta keteıik, buǵan deıin áıelder arasynda 60 metrge kedergiler arqyly júgirýden Áıgerim Shynazbekova, 3000 metrge júgirýden Tatána Neroznak, syryqpen sekirýden Anastasıa Ermakova, 400 metrge júgirýden Svetlana Golendova, úsh qarǵyp sekirýden Irına Ektova jáne erlerden syryqpen sekirýshi Nıkıta Fılıpov altyn alǵan bolatyn. Kúmis júldegerler qatarynda – Vıktorıa Zábkına (60 metrge júgirý), Elına Mıhına (400 metrge júgirý) bar. Jalǵyz qolanyń ıesi – Nadejda Dýbovıskaıa (bıiktikke sekirý).
