Elbasy Respýblıkalyq búdjettiń atqarylýyn baqylaý jónindegi esep komıtetiniń tóraǵasy Nurmuhambet Ábdibekovti qabyldady, dep jazady Qamshy.kz aqparat agenttigi Aqorda bergen málimetke súıenip.

Kezdesý barysynda N.Ábdibekov Nursultan Nazarbaevqa Esep komıtetiniń 2017 jylǵy jumysynyń negizgi nátıjeleri men aldaǵy kezeńdegi mindetteri jóninde baıandady.

Ótken jyldyń qorytyndysy boıynsha bul organ 354 nysanǵa 25 tekserý júrgizgen. Aýdıtorlyq is-sharalar nátıjesinde qaıtarylýǵa tıisti 307,3 mıllıard teńgeniń 198,5 mıllıardy ótelgenin málimdedi.

Nursultan Nazarbaev Esep komıtetine «Memlekettik aýdıt jáne qarjylyq baqylaý týraly» zań normalarynyń júzege asyrylýyn qamtamasyz etýdi tapsyrdy.

Sonymen qatar Qazaqstan Prezıdenti búdjet qarajatyn tıimdi paıdalaný isine Esep komıteti tarapynan neǵurlym muqıat baǵalaý júrgizýdiń mańyzdylyǵyna toqtalyp, zań buzýshylyqqa jol bermeý úshin júıeli sharalar qarastyrý kerek ekenin aıtty.

Memleket basshysy Esep komıtetiniń óńirdegi tekserý komısıalarynyń jumysyn úılestirýde, sondaı-aq olardyń qyzmetin jaqsartý jónindegi ádistemelik jáne tájirıbelik usynymdardy ázirleý isinde mańyzdy ról atqaratynyn atap ótti.

Kezdesý sońynda Nursultan Nazarbaev memlekettik aýdıt jáne qarjylyq baqylaý organdarynyń qyzmetin buǵan deıin qabyldanǵan normatıvtik quqyqtyq aktilerge jáne memlekettik baǵdarlamalarǵa sáıkes jetildirý jóninde birqatar naqty tapsyrma berdi.