«Qamshy» – erkin aqparat alańy. Hat qorjynymyzǵa kelip túsken jýrnalıs Órken Kenjebektiń Shyǵys Qazaqstan oblysynyń ákimi Danıal Ahmetov týraly maqalasyn oqyrman nazaryna usynýdy jón kórdik. Eger osy maqalaǵa baılanysty SHQO ákimdigi tarapynan qandaı da bir ýáj aıtylyp jatsa, ony da «Qamshy» portalynda jarıalaýǵa ázirmiz.
Qazir Shyǵys Qazaqstanda Gollıvýdtyń qartaıǵan juldyzdary qonaqta júr. Mark Dakaskos, Baı Lın, Kerrı Tagava, Erık Roberts, Maıkl Medson – osy bestik. Shamasy, eskort kompanıalarǵa bireýin shaqyrǵannan góri, beseýin ákelgen arzan-aý – «optom deshevle». Bylaı nıetteri jaqsy. Oblys ákimimen kezdesti. Endi tórt kún boıy oblystyń tórt aýdanynda bolyp, tarıhı jáne tabıǵı tamasha jerlerin aralap, 15 mınýttan 4 serıalyq derekti fılm túsirmek. Ony taǵy National Geographic jáne BBC-da aınaldyrmaq. Buǵan qazir qaıta oralamyn.
Másele - Danıal Ahmetovtyń ótirik aıtýynda. Nemese, oǵan ótirikti aıtqyzýynda. Mine, sol kezdesýde aıtqan sózinen úzindi: «V epohý sıfrovızasıı ınteres k Kazahstaný nýjno razvıvat, prıglashaıa takıh popýlárnyh lıchnosteı, ý kotoryh lúboı post v sosıalnyh setáh nabıraet bolee 60 mln laıkov. Prımer tomý demonstrırýet nasha gostá aktrısa Baı Lıng». Jaqsy, Baı Lın. Biz ony kóbine «Taksı 3» ne «»Adrenalın 2» fılmderindegi jaýyz, aýysh, sáıkesinshe, gollıvýdtyq tıpologıa boıynsha aqymaq personajdarymen bilemiz. Biraq, onyń atyn shyǵarǵany bul fılmderi de emes, ártúrli kesh-beshirlerdegi bir lypamen shyǵýy, jalańash perfomanstary edi. Eger men Baızaqovanyń ornynda bolsam, «Rýhanı jańǵyrýǵa» týra sol amplýadaǵy Baı Lındi shaqyrǵanyna tas-talqan bop, renjir edim)
Ok, áleýmettik jelidegi kez-kelgen posty 60 mıllıon jınaıdy dedi ǵoı, álginde, Danıal... Instagramyn qaraıyq - 33 myńǵa da jetpeıdi. Almatynyń bir saýnasynda qyzdyrynyp jatqany 2 200-aq kórilim jıǵan, Qazaqstanǵa keldim degen posty 597 laık qana. Lentasyn qarap shyqtym - eń jalańash degen fotosynyń 2 500 laık jınaı almaǵan. Qaıda 60 mıllıon laık? Qaıda, mıllıondar? Qyp-qyzyl ótirik. Ahmetovke ótirik aıtqyzdy, bilmedim, baspasóz hatshysy ma, álde prodúserler me... Bul úlken másele deseńiz, qatelestińiz.
Biz kez-kelgen istiń ortasyn ustaı almaı jatamyz osy. Din ustansaq ta, ne radıkal, ne ateıs. Saıasatta júrsek te, ne opozısıa, ne jaǵympaz. «Rýhanı jańǵyrý» da sondaı bop ketti. Bir ákimder bala qoraz ánshilerdiń baıqaýyn da qyzyl-jasyl búrkittiń logosymen basyp, esebin bastyryp jatyr. Al Shyǵys Qazaqstan oblysy sekildiler buǵan álemdik masshtab bergensip, maqsatyn burmalap ketti. Elbasynyń «Rýhanı jańǵyrý» baǵdarlamasyn túsinbeı, burmalap, qıdalap ketken ákimderdi synaǵany keshe ǵana emes? «Rýhanı jańǵyrý» baǵdarlamasyn kim ashyp qarady? Ondaǵy alty basymdyqtyń jeteýi de tek qazaqtardyń qamyna baǵyshtalǵan. Qazaqtyń sanasy ashyq bolsyn, evolúsıalyq jolmen damysyn, báseke qabiletti bolsyn, kánse de kánsov, ysyrapshyl bolmasyn, pragmatık bolsyn degendi aıtady.
Aıtaıyn degenim, Altaıdyń ádemi tabıǵaty men Semeıde jarylǵan bombanyń ornyn túsirip alyp, Mark Dakaskosqa eki aýyz sóıletip, ony BıBıSıden kórsetkennen, qazaq rýhanı jańǵyra ma? Joq! Syrtqy ister mınıstrliginiń syrtqy ımıj boıynsha baǵdarlamasy bolsa, túsiner em. Júzege aspaı qalǵan «Ulttyq brend» baǵdarlamasy bolsa, túsiner em. Biraq, Batystan bes shal-kempirdi shaqyryp alyp, bir saǵattyq derekti fılmdi taǵy da Batysta kórsetý «Rýhanı jańǵyrýdyń» babyna esh kelmeıdi. Keshirińiz.
