2017 jyly Astanadaǵy 28 aıaldama men birqatar qoǵamdyq orynda QR-kodtary bar úsh tilde usynylǵan kitaptar taqtasy paıda boldy, dep habarlaıdy Qamshy.kz aqparat agenttigi elorda ákimdiginiń resmı saıtyna silteme jasap.
«Rýhanı jańǵyrý» baǵdarlamasynyń aıasynda qolǵa alynǵan «Astana – Bilimland» jobasyna WikiBilim qoǵamdyq qory men elorda ákimdigi muryndyq boldy. Ulttyq aýdarma búrosy qoǵamdyq qorynyń atqarýshy dırektory Raýan Kenjehanulynyń aıtýyna qaraǵanda, atalmysh jobany júzege asyrýdyń tájirıbesi elimizdiń basqa óńirlerinde de qoldanyla bastaǵan.
«Astana – Bilimland» jobasy aıasynda qazaqy rýhanıatty qoldaý, ony zamanǵa saı úlgide taratý, qalada qyzyq atmosfera týǵyzý úılesim taýyp, halyqtyń jaqsy baǵasyna ıe boldy. Olaı dep aıtýymnyń sebebi, Astana qalasynyń osy tájirıbesin basqa da kóptegen aımaqtar alyp jatyr. Qyzylorda, Aqtóbe, Almaty oblystaryndaǵy qoǵamdyq oryndarda osyndaı taqtalar ornatylǵandyǵyn estip, qýanyp jatyrmyz. Halyqqa qyzmet kórsetý ortalyqtarynda, oqý oryndarynyń kitaphanalarynda, emhanalar men aýrýhanalarda, adamdar kóp jınalatyn jerlerde bul joba týraly biledi», – dedi Raýan Kenjehanuly.
Taqtada usynylǵan kitaptardyń ishinen unaǵanyn oqý úshin azamattardyń ınternet jelisine qosylǵan uıaly telefony bolsa, jetkilikti. Oqyrmandar kitapty tańdap, ony QR-kody arqyly skanerlep, kitaptyń siltemesin ala alady.
Bul kitaptardyń barlyǵyn Qazaqstannyń ulttyq elektrondy kitaphanasy platformasynan tabýǵa bolady. Bes jyl ishinde 10000 kitap, 1500 aýdıokitap, 120 myńnan astam sózi men sóz tirkesi bar ámbebap sózdik, kórnekti qoǵam qaıratkerleriniń daýystary jazylǵan plasınkalar sandyq formatqa kóshirilip, olardyń elektrondy nusqalary shyǵaryldy.
