Rımde ónerkásiptik jáne ekonomıkalyq yntymaqtastyq ornatý jáne almasý boıynsha Qazaqstan-Italıa Úkimetaralyq jumys tobynyń (HJT) 8-shi otyrysy ótti, dep habarlaıdy Qamshy.kz aqparat agenttigi.
Qabyldaýshy tarapty Italıanyń ekonomıkalyq damý vıse-mınıstri Ivan Skalfarotto bastady.
HJT aıasynda ınvestısıalar salasynda QR IDM Investısıalar komıtetiniń tóraǵasy Erlan Qaıyrov sóz sóıledi.
«Italıa Eýropamen saýda aınalymy boıynsha basty seriktesterdiń biri jáne jetekshi ınvestor ekenin atap ótkim keledi. Qazaqstan men Italıa arasyndaǵy syrtqy saýda aınalymy 2017 jyldyń qorytyndysy boıynsha $9,6 mlrd qurady, bul ótken jyldyń uqsas kezeńinen 13,5%-ǵa artyq. Qazaqstan Eýrazıalyq ekonomıkalyq odaq quramynda. Bul kedendik shekaralary joq syıymdylyǵy 180 mln-nan astam adam bolatyn syrtqy taýar aınalymy shamamen $1 trln biryńǵaı naryq. Sondyqtan, men Qazaqstandy EýrazEQ, Qytaı, Ortalyq Azıa jáne Taıaý Shyǵys elderiniń úlken naryqtaryna shyǵý úshin ónim óndirýge arnalǵan alań retinde qabyldaýdy usynamyn», — dedi Erlan Qaıyrov.
İs-sharalar barysynda ekijaqty yntymaqtastyq jaǵdaıyn baǵalaýmen jáne Qazaqstan-Italıa ózara is-qımylyn odan ári damytýmen baılanysty basymdyqty máselelerdiń keń spektri qaraldy. Taraptar iskerlik jáne bank toptarynyń ózara is-qımylyn jandandyrýdy, quqyqtyq bazany, energetıka, ónerkásip, aýyl sharýashylyǵy salasyndaǵy yntymaqtastyqty damytýdy, gýmanıtarlyq yntymaqtastyqty damytý salasyndaǵy máselelerdi talqylady. Ekijaqty ózara is-qımyldyń perspektıvaly baǵyty mádenıet jáne týrızm salasynda yntymaqtastyq ornatý bolyp belgilendi.
Sol kúni HJT otyrysy aıaqtalǵan soń Italıadaǵy Qazaqstan elshiligi Jalpyǵa birdeı ıtalıalyq ónerkásip konfederasıasy jáne ICE-men birge Qazaqstannyń ekonomıkalyq múmkindikterin tanystyrýǵa arnalǵan bıznes forým ótkizdi, oǵan iri ıtalıalyq kompanıalar men bıznes qaýymdastyqtardyń ókilderi qatysty.
Ótken jyly Qazaqstan men Italıa dıplomatıalyq qatynastarynyń jıyrma bes jyldyǵyn atap ótken bolatyn.
25 jylda Italıa respýblıkasy elimiz úshin basty ınvestorlardyń birine aınaldy jáne yntymaqtastyqty jalǵastyrýǵa múddeli. Italıalyqtar Qazaqstanmen jańa sala — jasyl tehnologıalar salasynda yntymaqtastyq ornatý úshin Astanada «Ekspo-2017» kórmesine qatysý múmkindigin paıdalandy.
