Óskemendik molda jelini shýlatqan sýretke qatysty túsinikteme berdi, dep jazady Qamshy.kz aqparat agenttigi.

Gollıvýd juldyzdarynyń Óskemendegi «Halıfa Altaı» meshitinde túsken sýreti jelide qatty talqylanyp jatyr. Ásirese, din ókiliniń aktrısa Baı Lınǵa «birtúrli» qarap qalǵan sátin kóz zınasyna balap, san-saqqa júgirtkender kóp.

Qamshy.kz aqparat agenttigi mán-jaıdy bilý úshin sýrettegi moldanyń ózimen tildesti. Ol Óskemendegi «Muhammadı» meshiti ımamynyń orynbasary Dýbek Qusaıynov bolyp shyqty. Moldanyń aıtýynsha, bul jerde arandatýshylyqtan basqa dáneńe joq.

- Bul sensasıaǵa ulasady dep oılamappyn. Úsh uıyqtasam da, túsime kirmeıtin jaǵdaı. Negizi bul fotoda qalanyń ımamdary sapta tizilip tur. Meniń fotomdy arnaıy qıyp alyp, «kóz zınasy» dep jala jaýyp, kúpirlikke salynǵan negizsiz, jalǵan aqparat qana bul. Eshkimnen jasyrynyp qaraǵan joqpyn, bul jerde ashyqtyq bar, - degen Dýbek Qusaıynov jeli qoldanýshylarynyń áreketin ózi de qatań synady.

Molda halyqty adamgershilikten attamaı, mádenıetti bolýǵa shaqyrdy. «Áleýmettik jelini kezip júrgen fotosýret – adamnyń oıynda joq nárseni aıtyp ǵaıbattap, arandatyp, qoǵamnyń teris baǵyttaǵy pikirin týǵyzbaqshy bolǵandardyń isi, - dep ashyndy.

- Basshylyq bizdi akterlar keldi dep meshitke shaqyrtqan soń aq shapanymyzdy kıip bardyq. Ulttyq naqyshtaǵy shapanmen turǵandyqtan, sheteldikter qyzyqqan bolýy kerek, ózderi sýretke túsýge nıet bildirdi. Biz kelise kettik. Sonda ana aktrısaǵa kózimniń qıyǵymen qarap qalǵan sátim túsip qalypty. Men qyzǵa emes, onyń erekshe kıim úlgisine nemese kózildirigine qaraǵan bolýym kerek. Dál osylaı órship ketedi dep oılamappyn. Ol áıel meshitke ashyq-shashyq kıinip kelgen joq, tipti, onymen tildesý de oıymda bolǵan joq. Biz din ókili bolǵandyqtan, halyq bizge qarap ımandylyqty tanıdy. Al adamdardy teris tárbıeleý bizdiń oıymyzda da joq, - dedi Dýbek Qusaıynov.