Kók-Tóbede sýretke túsýge tyıym salyndy. Bul týraly fotograf Maksım Zolotýhın óziniń Facebook paraqshasynda jazdy, dep habarlaıdy Qamshy.kz aqparat agenttigi. 

«Búgin tańerteń bir-eki sýret túsirý úshin Kók-Tóbege kóterildim. Alaıda meni joldan kúzetshiler toqtatyp, terrorlyq qaýpi bar bolǵandyqtan maǵan fotoaparatpen júrýge ruqsat bermeıtindikterin aıtty. Biraq, kez kelgen máseleden shyǵýdyń joly bar. Olarǵa 35 myń teńge berip, fotoaparatymdy kóterip, serýenimdi jalǵastyrdym. Tólengen 35 myń teńge sýretterdiń terrorıstter qolyna túspeýine kepildik bere alatyndaı», dep jazdy ol.

Fotograftyń «nelikten aqsha tóleýim kerek? Men Qaırat Nurtasqa nemese toıǵa arnap vıdeo jazba túsirip jatqan joqpyn ǵoı» degen qarsylyǵyna kúzetshiler ishki tapsyrmaǵa sáıkes «foto-vıdeo túsirýdiń saǵatyna 35 myń teńge» dep bekitilgen qaǵazdy usynǵan.

Aqy tóleýdiń negizgi sebepkeri – fotoaparat bolǵan. Fotografqa Kók-Tóbege kelgen sheteldikter de fotoaparatpen júrýge tyıym salynǵandy aıtylǵan. Atalmysh jaǵdaıdan keıin Maksım Almaty týrızm basshylyǵyna degen renishin jasyra almady. Ol «men barǵan eshbir elde sýretke túsirýge tyıym salmaǵan» dep renish bildirdi.

Osy jazbadan keıin Maksım Zolotýhın áleýmettik jelidegi óz paraqshasynda Kók-Tóbe ákimshiliginen atalmysh máselege baılanysty jaýap kelgendigin aıtty. Olar fotograftan keshirim surap, kúzetshilerdiń habarlamany durys aıtpaǵanyn jetkizgen. Kók-Tóbe ákimshiligi: "Sýretti qala turǵyndary, kásibı fotograftar jáne týrıser tegin túsire alady. Osyndaı jaǵdaı qaıtalana qalsa,bizge habar berińiz" dep jazǵan.