Jazýshy, ádebıet zertteýshi, synshy, aýdarmashy Gerold Belger ómirden ozdy 81 jasyna qaraǵan shaǵynda ómirden ozdy.
Esterińizge sala keteıik, Gerold Belger 21-shi qańtarda aýyr jaǵdaıda emhanaǵa túsken bolatyn.
Qazaqstandaǵy ulty nemis, ózi úsh tilde qazaq, orys, nemis tilderinde erkin jazatyn jazýshy Gerold Belger qazaq shyǵarmalaryn álem tilderine aýdaryp, tanylýyna úles qosqan tulǵa.
Gerold Belger 1934 jyly qazanda Reseıdiń Saratov oblysynda, Volga boıyndaǵy nemis ASSR-inde etnıkalyq nemis otbasynda dúnıege kelgen. 1941 jyly Stalınniń jarlyǵymen barlyq nemistermen birge Soltústik Qazaqstandaǵy qazaq aýylyna jer aýdarylǵan. Qazaq tilinde mektepte bilim alyp shyqqan Gerold Belger Almatydaǵy Qazaq pedagogıkalyq ınstıtýtynyń (qazirgi Abaı atyndaǵy ýnıverstıtet) fılologıa fakúltetin támamdaǵan.
Ámirhan Meńdeke, synshy:
«Ol qazaqty aldamaıdy»
– Qazaqstandaǵy ádebıetshilerdiń ishinde bir árpin qaldyrmaı oqıtyn adamdarym bar. Sonyń biri – Gerold Belger. Ol kisini azamat, jazýshy, aýdarmashy, iri ǵalym retinde qatty qurmetteımin. Bilimi – ushan-teńiz. Jáne bilimin óz shyǵarmashylyǵynda keremet paıdalana alady. Kórgeni de, túıgeni de mol. Bizdiń klasık jazýshymyz Ábdijámil Nurpeıisov kúrdeli tulǵa. Ol týraly tek Gerold Belger ǵana shynaıy jaýap bere biledi. «Nurpeıisovtiń jazýshy retindegi baǵy nede, sory nede?» degen suraqtyń jaýabyn Belger maqalalary men kúndelikterinde ádemi jetkizgen. Gerold – qazaq ádebıetiniń shyn janashyry, jankúıeri. Ol – qubylys. Osyndaı qubylys ózge ádebıette joq. Ózbek ádebıetinde ózge ult ókilderi bar. Biraq olar dál Belgerdiń qazaq ádebıetine sińirgen eńbegin isteı alǵan joq. Belgerdiń qazaqqa, qazaq ádebıetine degen mahabbaty sheksiz. Eki-aq mysal keltireıin: «Abaı jolynyń» aýdarmasy týraly jazǵan maqalasyndaı maqalany bir qazaq jaza alǵan joq. Áýezovti osynsha tereń biletin adamdy birinshi ret kezdestirdim. Sosyn Júsipbek Aımaýytov aqtalǵanda jazǵan maqalasy da tereń zertteý, saralaý. Aımaýytovty taný Belgerden bastalady. Qazaqty ótirik súıetinder kóp. Ol qazaqqa kúldirtip turyp emes, jylatyp turyp aıtady. Gerold degen sózdiń ózi kóne german tilinen aýdarǵanda aqıqattyń jarshysy degen maǵyna beredi. Qazirgi ádebı prosesc, jazýshylar, qoǵam týraly barlyq máseleniń aqıqatynyń jarshysyna aınalǵan jan. Ol kisiniń shyǵarmashylyǵyn da, pikirlerin de aıyzyń qanyp oqısyń. Qazaqtyń janyna batyryp-batyryp aıta alady. Geraǵańnan qazaq tili týraly úlken suhbat alýǵa bolady. Osy ýaqytqa deıin ol kisiden shala suhbat alynyp keldi. Qazaqqa janashyr ekenin sózimen ǵana emes, isimen dáleldegen adam. Ol qazaqty aldamaıdy. Qolymda bılik bolsa, joǵaryda atalǵan eki maqalasy úshin memlekettik syılyq berer edim.
