Sońǵy ýaqytta bolyp jatqan soraqy qubylystardan keıin Májilis depýtaty Nurtaı Sabılánov osyndaı bastama kóterip otyr. Taraz qalasynda ótken toı halyq qalaýlyrynyń tóbelerinen jaı túsirgendeı áser qaldyrypty. "Bul qazaq qyzdaryna, qala berdi ult aryna jaǵylǵan qara kúıe", - deıdi depýtattar. "16-18 Qyz bala tárbıesi qazir óte jylaıtyn jaǵdaıda tur. Óksip jylaıtyn jaǵdaıda tur", - deıdi "Aıgólek" jýrnalynyń bas redaktory Qymbat Ábildına. Ashshy bolsa da, bul shyndyq. Qazir qyz qylyǵy ózgerdi. Bıazylyǵyn - buzaqylyqqa, uıańdyǵyn - uıatsyzdyqqa almastyrdy. Oǵan dálel kóp. Máselen, dúıim jurttyń jaǵasyn ustatqan  beınetaspa jaqynda ǵalamtorda jarıalandy. Jataqhanalardyń birindegi jas shamalary 15-16-daǵy órimdeı qyzdar. Ózara kelispeı qalyp, máseleni judyryqpen sheshýde. Tóbelesten ózge taǵy bir "ónerdi" shyǵardy qyzdarymyz. Týrasyn aıtqanda, toı ústinde tánderin kórsetetin boldy. Batystyń tilimen aıtqanda, strıptız. Bul ózi qanshalyqty qazaqtyń toıynyń kórkin ashady? Qaba saqal qarıalar, aq jaýlyqty ájeler, aýyzynan ana súti ketpegen sábıler otyrǵan jerde jalańash qyzdyń esersoq bıi ne úshin kerek? "Sózim joq. Sózim joq degen adamnyń sózi taýsylǵanda aıtylady ǵoı. Qazirgi bizdiń toıdyń ózine úlken bir kózqaras kerek bolyp tur", - deıdi Qymbat Ábildına. Jańa kózqaras. Osynyń ózine bir zań kerek bolyp tur toı ótkizýge qazir. Zań demekshi, bizde bul jaǵdaıǵa qatysty jazalaýdyń tetikterin izdestirip, depýatattarǵa bardyq. Soraqy beınetaspany kórgen halyq qalaýlylarynyń aldymen tili baılanyp qaldy. "Bul kórsetken vıdeońnan meniń alǵan áserim árıne boıym titirkenip, terlep kettim. Siz meniń ústimnen sý quıyp tastaǵandaı pozısıada qalyp otyrmyn. Mundaıdy kórmeppin. Kórgennen keıin ózim de shoshynyp qaldym", - deıdi Májilis depýtaty Serikbaı Nurǵısaev. Esersoq beınetaspalardy depýtatarǵa kórsetkenimizden bir nátıje shyǵar degen úmit paıda boldy bizde. Sebebi, májilismen Nurtaı Sabılánov álgi toıdyń ıesin de, bıshi qyzdy da jaýapkershilikke tartý týraly bastama kóteretinin málimdedi. "Osyndaı keleńsiz jaǵdaılardy boldyrmaý úshin jańaǵy azamattardy nemes sol uıymdastyryp júrgen adamdardy qatań jaýapkershilikke tartýdy qarastyrý kerek. Áıtpese ol ary qaraı kete beredi", - deıdi Sabılánov. Ashynǵan májlismen tipti jazanyń qandaı bolatynyn da jobalap berdi. "Birinshiden aıyppul salý kerek, ekinshiden tym shekten shyǵyp bara jatsa qylmystyq jaýapkershilikke tartý kerek. Sodan keıin jazanyń taǵy bir túri bul myna qoǵamǵa osyndaı adamdardyń fotosýretterin kórsetip, qoǵamdy osydan habardar etýimiz kerek", - dedi Májilis depýtaty Nurtaı Sabılánov. Al aq jaýlyqty analarymyz ben ımamdarymyz da qarap qalmaq emes. Nasıhat jumystaryn júrgizý kerek dep otyr. "Qyzym seniń aramnan taýyp kelgen aqshańa men qýanbaımyn degendi aıtý kerek. Qyzyń seniń aramnan aryńdy taptatyp tapqan aqshań seni baqytty qylmaıdy degendi aıtý kerek. Biz de baqytty bolmaımyz, sen de baqytty bolmaısyń degendi aıtý kerek", - degen pikirde Qymbal Ábildına. Imamdar bolsa, buǵany er azamattyń, otbasyndaǵy ákeniń de qatysy baryn aıtady. "Erkekterdiń de osyǵan tikeleı qatysy bar. Sol qyzdy tárbıeleı almaı ósirgen ákesi, ákesi bolmasa onyń aǵasy, er kisiler. Áke nemese aǵa osy kisilerge qorǵan bolý kerk. Tárbıe berýimiz kerek", - deıdi  "Áziret Sultan" meshitiniń naıb-ımamy Baqytjan Ótkelbaev. Qazaq qyzynyń ary taptalǵan taǵy bir jaıtqa toqtalaıyq. Bul joly estrada ánshileri ult abyroıyn aırandaı tókti. Ózbekstandyq Bahadúr Iýldashev degen klıp rejıseri ózderiniń "Darakchı" gazetine bergen suhbatynda "Qazaqstandyq ánshi qyzdarǵa klıp túsirgen ońaı, olarǵa bir kerýet pen ishkóılek berseń boldy. Sol kerýette aýnap, óz tánin ózi sıpalap, aımalap, máz bolyp túse beredi" depti. Sózine dáleli bar. Jadı esimdi ánshimiz Ózbekstanda beınebaıan túsiripti. Munda da ashyq-shashyq kóılek, kerýert jáne óz-ózin aımalaý. Biz aıtýdan jalyqpaımyz. Ideal qazaq qyzynyń bolmysyn qalyptastyrýdyń basty qaǵıdasy babalar salǵan 40 tıym. Osyny bilgen qyz, otbasyn, áýletin, ultyn jerge qaratpasy anyq.