QR Jazýshylar odaǵynyń ádebıetshiler úıinde aqıyq aqyn M.Maqataevtyń týǵan kúnine arnalǵan "Jyrlaıdy júrek" atty poezıa jáne án keshi ótti, - dep habarlaıdy Qamshy.kz portaly.
Keshte Qazaqstan estrada juldyzdary men teatr maıtalmandary óner kórsetti. Qazaq poezıasynyń aqtańgeri, muzbalaq aqyn Muqaǵalı Maqataevtyń týǵan kúnine jazýshylar odaǵy, ádebıetshiler úıine jınalǵan halyqta qarasy kóp boldy. Ádebıetshiler úıine kórermenge lyq tolyp, oryn jetpeı qalǵan kórermender eki saǵatqa sozylǵan konsertti tikesinen tik turyp tamashalady.
Poezıa men án keshiniń shymyldyǵyn QR Jazýshylar odaǵy basqarmasynyń tóraǵasy, senat depýtaty Nurlan Orazalın ashyp, aqynnyń poezıasynyń qarapaıymdylyǵyn, qudyrettiligin sondaı-aq, kórkemdigin taldady. Aqynnyń ómir joly týraly esteliktermen bólisip, shyǵarmashylyǵy týraly kóptegen jaqsy sózder aıtyldy. Keshke aqynnyń uly Juldyz Muqaǵalıuly, aqyn Ǵalym Jaılybaı jáne kóptegen qalamgerler men óner juldyzdary qatysty. Aqynnyń sózine jazylǵan tamasha ánderdi Tańat Mamyrhanuly, Sulýshash Nurmaǵanbetova qatarly elge tanymal ónerpazdar naqyshyna keltire oryndady. Keshti aqyn Baqyt Bedelhan júrgizip otyrdy. Sonymen qatar, aqynnyń óleńderin mektep búldirshinderi men M.Áýezov atyndaǵy memlekettik drama teatrynyń akterleri mánerlep oqydy.
Bıyl qazaqtyń Muqaǵalıynyń ortamyzdan ketketine 40 jyl tolady eken. Osy keshte Aqyn Ábdildá Tájibaevtyń: "Óleń ólmeıdi. Endeshe ony jazǵan aqyn da ólmeıdi. Sol sekildi Maqataev ta kóz jumǵan joq. Qatarymyzda, kúnbe kún qasymyzda" degen sóziniń ras ekenine kózimiz taǵy bir márte jetkendeı boldy. Qazaq qara óleńiniń muzbalaǵy óziniń óleńderimen máńgi jasaı bermek. Búgin de ol muzbalaq qyransha dúr silkinip, búkil zaldy bir ózi toltyryp otyrǵandaı boldy. Keshke jınalǵan jyr súıer qaýym da jazyq mańdaıy jarqyrap, jarqyldap jyr oqyp turǵan aqynnyń poezıasymen, ózimen syrlasqandaı ásermen tarqasty.
Nurgeldi Ábdiǵanıuly
