Jaqynda qalalyq máslıhattyń turaqty komısıalarynyń qoǵamdyq tyńdaýynda Astanada ashylatyn tórtinshi aýdanǵa Baıqońyr ataýy usynylyp, maquldandy, dep jazady Qamshy.kz aqparat agenttigi Astana aqshamy gazetine silteme jasap.
Osy aptada qalalyq onomastıkalyq komısıa bul ataýdy talqylap, bekitti. Respýblıkalyq onomastıkalyq komısıa qalalyq komısıa sheshimin ózgertpeı, óz otyrysynyń hattamasyn ákimdikke jiberdi. Keshe ótken qalalyq Qoǵamdyq keńes otyrysynda Astana máslıhatynyń hatshysy Janat Nurpeıisov osylaı dep habarlady.
Qoǵamdyq keńeste qaralǵan máselelerdiń biri Astana qalasynyń shekaralaryn belgileýge qatysty boldy. Onymen Sáýlet jáne qala qurylysy basqarmasynyń basshysy Baqtybaı Taıtalıev tanystyrdy.
«Sońǵy bes jylda Astana halqynyń sany 35 paıyzǵa ulǵaıyp, 645 myń adamnan 1 mln 10 myń adamǵa jetti. Byltyr qala terıtorıasyna 8 myńnan astam gektar qosyldy. Bul – Maıbalyq kóli, panteon. Halyqtyń tyǵyzdyǵy máselesin sheshý úshin jańa mektepterdi, balabaqshalardy, emhanalardy, kólik júıesin, ınjenerlik ınfraqurylymdy salý maqsatynda tórtinshi aýdandy ashý qajettiligi týyndady» dedi baıandamashy.
Onyń aıtýynsha, tórtinshi aýdannyń shyǵys bóligi Almaty aýdanymen, batys jáne ońtústik bóligi Saryarqa aýdanymen, al Esil ózeni arnasymen Esil aýdanymen shekaralasady. Jalpy alǵanda, qala aýmaǵy 79 myń 733 gektardy qurasa, sonyń ishinde jańa aýdan 18 myń 129 gektardy alady. Halyq sanyna kelsek, onda 211 myń adam turatyn bolady.
Qoǵamdyq keńes otyrysynda, sondaı-aq, Astanadaǵy qorshaǵan ortany saýyqtyrýdyń 2018-2020 jyldarǵa arnalǵan keshendi jospary jobasy talqylandy. Jobany qalalyq Tabıǵı resýrster jáne tabıǵatty paıdalanýdy retteý basqarmasymen birge Qazaqstannyń ekologıalyq uıymdary asosıasıasy ázirledi. Atalmysh asosıasıa tóraıymy Aıgúl Soloveva keńes músheleri qoıǵan suraqtarǵa jaýap berdi.
Bul jobaǵa sáıkes, Promyshlennyı turǵyn alabyn 2-JEO-dan keletin ortalyqtandyrylǵan jylý júıesine qosý josparlanýda. A.Solovevanyń sózinshe, alaıda bul eldi mekenniń búkil turǵyndaryn ortalyqtan beriletin jylýmen qamtý ázirge múmkin emes. Tek bir avtonomdy qazandyqty tutynýshylar ǵana ortalyq jylý júıesine qosylady. Sol kezde qazandyq joıylady. Sonyń ózinde aýaǵa taralatyn zıandy qaldyqtar edáýir azaıatyn kórinedi. Máselen, «Astana Energıa» AQ-tyń qorshaǵan ortany qorǵaý zerthanasynyń meńgerýshisi Natalá Mýhınanyń aıtýynsha, qaldyqtar 17 tonnaǵa kemıdi.
Otyrysta, buǵan qosa, qala ekologıasy, elordaǵa gaz tartý máselesi, onyń tıimdiligi týraly biraz aıtyldy. Osydan birneshe jyl buryn Astananyń birqatar nysandary suıytylǵan gazben jylytyla bastady. Aldaǵy jyldary Qyzylordadan qubyr beri qaraı tartylyp, Qaraǵandy arqyly tabıǵı gaz da kelýi tıis. Osynyń qaısysy arzandaý bolady? Keńes músheleriniń pikirinshe, aıtqandaı aıyrmashylyq baıqalmaıdy.
Astanadaǵy qorshaǵan ortany saýyqtyrýdyń 2018-2020 jyldarǵa arnalǵan keshendi jospary jobasyn júzege asyrýǵa ınvestorlar tartylmaq. Qoǵamdyq keńes bul jobany bekitti.
